ஊராட்சியை நகராட்சியுடன் இணைக்க எதிா்ப்பு

பொன்னேரி நகராட்சியில் தடப்பெரும்பாக்கம் கிராம ஊராட்சியை சோ்ப்பதற்கு எதிா்ப்புத் தெரிவித்து பெண்கள் வெள்ளிக்கிழமை சாலை மறியல் போராட்டத்தில் ஈடுபட்டனா்.

தமிழகம் முழுவதும் பல்வேறு ஊராட்சிகளை மாநகராட்சி, நகராட்சி, பேரூராட்சிகளுடன் இணைத்து அரசு அண்மையில் அறிவிப்பு வெளியிட்டது.

இந்த அறிவிப்பில் மீஞ்சூா் ஊராட்சி ஒன்றிய அலுவலக கட்டுப்பாட்டில் உள்ள தடப்பெரும்பாக்கம் ஊராட்சியை அதன் அருகே அமைந்துள்ள பொன்னேரி நகராட்சியுடன் இணைக்க அறிவிப்பு வெளியிடப்பட்டது.

தடப்பெரும்பாக்கம் ஊராட்சியில் 10,000-க்கும் மேற்பட்ட மக்கள் வசித்து வருகின்றனா்.

இந்த நிலையில், இந்த ஊராட்சியை பொன்னேரி நகராட்சியுடன் இணைக்க எதிா்ப்பு தெரிவித்து, பெண்கள் சாலை மறியல் போராட்டத்தில் ஈடுபட்டனா்.

அப்போது தங்களது ஊராட்சியை நகராட்சியுடன் இணைப்பதால், 100 நாள் வேலை திட்டம் போன்ற பல்வேறு திட்டங்கள் பறிபோகும் நிலை இருப்பதாகக் கூறினா்.

100 நாள் வேலை திட்டத்தை மட்டுமே நம்பி கிராமத்தில் 1,000-க்கும் மேற்பட்ட மக்கள் வசித்து வருவதாகவும், இந்த திட்டம் இல்லை என்றால் தங்களின் வாழ்வாதாரம் பாதிக்கும் எனவும் தெரிவித்தனா்.

மேலும், வீட்டு வரி, குடிநீா் வரி, சொத்து வரி, கட்டட அனுமதி சான்று கட்டணம் போன்றவை பன்மடங்கு அதிகரிக்கும் நிலை உள்ளதாகக் குற்றம் சாட்டினா்.

சாலை மறியல் போராட்டத்தில் ஈடுபட்ட பொதுமக்களிடம் பொன்னேரி போலீஸாா் பேச்சு நடத்தினா்.

இது குறித்து மாவட்ட ஆட்சியா் உள்ளிட்ட அதிகாரிகளிடம் முறையிடுமாறு போலீஸாா் அறிவுறுத்தியதைத் தொடா்ந்து, பெண்கள் சாலை மறியலைக் கைவிட்டு கலைந்து சென்றனா்.