``என்னப்பா அதானியைப் பற்றி பேசியதும் பவர் கட் ஆகுது!'' - பத்திரிகையாளர் சந்திப்பில் தமிழிசை

இந்திய தொழிலதிபர் அதானி, சூரிய சக்தி மின்சாரத்தை தமிழ்நாடு உள்ளிட்ட பல்வேறு மாநிலங்களுக்கு விற்பதற்காக 250 மில்லியன் டாலர் அளவுக்கு லஞ்சம் கொடுத்ததாகவும், அதை மறைக்கத் திட்டமிட்டதாகவும் அமெரிக்க நீதிமன்றத்தில் சமீபத்தில் குற்றம் சுமத்தப்பட்டது. இந்தக் குற்றச்சாட்டு வெளியானதும், கடந்த சில மாதங்களுக்கு முன் சென்னை வந்த அதானி, முதல்வர் ஸ்டாலினைச் சந்தித்து இதுதொடர்பாக பேசியதாகத் தமிழக எதிர்க்கட்சிகள் குற்றம்சாட்டின.

இதற்கு எதிர்வினையாற்றிய தமிழக மின்சாரத்துறை அமைச்சர் செந்தில் பாலாஜி, அதானியை முதலமைச்சர் சந்திக்கவேயில்லை என்றும், பொய் பரப்பினால் நடவடிக்கை எடுக்கப்படும் என்றும் அறிக்கை வெளியிட்டார். அதைத்தொடர்ந்து, நேற்று நடைபெற்ற சட்டமன்றக் கூட்டத்தில் முதலமைச்சர் ஸ்டாலின், ``அதானி விவகாரத்துக்கும் தமிழ்நாட்டுக்கும் எந்த சம்பந்தமும் இல்லை. என்னை வந்து அவர் சந்திக்கவும் இல்லை. நானும் அவரைப் பார்க்கவில்லை" என்று தெரிவித்தார்.

இந்த நிலையில், பா.ஜ.க முன்னாள் மாநில தலைவர் தமிழிசை சௌந்தரராஜன், தனது குடும்பத்தைச் சார்ந்தவர்கள் யாரும் அதானியைச் சந்திக்கவில்லையா என்பதை முதலமைச்சர் விளக்கவேண்டும் என்று கூறியிருக்கிறார். முன்னதாக, பாரதியார் பிறந்தநாளை முன்னிட்டு சென்னை மெரினா கடற்கரையில் இன்று காலை பாரதியார் சிலைக்கு தமிழிசை சௌந்தரராஜன் மாலை அணிவித்து மரியாதை செய்தார்.

பின்னர் செய்தியாளர்களைச் சந்தித்த தமிழிசை சௌந்தரராஜன், அதானி குறித்து பத்திரிகையாளர் எழுப்பிய கேள்விக்கு, `` `நான் சந்திக்கவில்லை' என்றுதான் முதலமைச்சர் சொல்கிறார். தன் குடும்பத்தைச் சார்ந்த யாரும் சந்திக்கவில்லையா என்பதை முதலமைச்சர் விளக்க வேண்டும். அதுதான் தமிழக மக்களின் விருப்பம்." என்று கூறினார்.

மேலும், இவ்வாறு கூறிக்கொண்டிருந்தபோது ஒரு நொடி மின்விளக்கு அணைந்து எரிந்தபோது, ``என்னப்பா அதானியைப் பற்றி பேசியதும் பவர் போய்டுது. மின்சாரத்துறை அமைச்சருக்கும் இதற்கும் எதோ சம்பந்தம் இருக்கும் போலிருக்கு." என்று சிரித்துக்கொண்டே பேசி அங்கிருந்து நகர்ந்தார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/TATAStoryepi01