எருதுவிடும் விழாவில் மாட்டின் கயிற்றில் சிக்கி காயமடைந்த மாணவா் உயிரிழப்பு

வாணியம்பாடி: வாணியம்பாடி அருகே எருதுவிடும் விழாவில் மாட்டின் கயிற்றில் சிக்கி பலத்த காயம் அடைந்த பள்ளி மாணவா் உயிரிழந்தாா்.

திருப்பத்தூா் மாவட்டம், வாணியம்பாடி அடுத்த புல்லூா் கிராமத்தில் கடந்த 7-ஆம் தேதி எருது விடும் திருவிழா நடைபெற்றது. இதில், திம்மாம்பேட்டை அரசு மேல்நிலைப் பள்ளியில் 8-ஆம் வகுப்பு படித்து வந்த சிமுக்கம்பட்டு கிராமத்தைச் சோ்ந்த சதீஷ் (12) விழாவை பாா்க்கச் சென்றாா். அப்போது நடுமந்தையில் உள்ளே நின்றிருந்தபோது, அதிவேகமாக ஓடிய மாட்டின் கயிறு மாட்டி கீழே விழுந்துள்ளாா். இதில், அவருக்கு கழுத்து, தலை, இடுப்பு ஆகிய பகுதிகளில் பலத்த காயம் ஏற்பட்டது. உடனே அங்கிருந்தவா்கள் சதீஷை மீட்டு, 108 ஆம்புலன்ஸ் மூலம் வாணியம்பாடி அரசு மருத்துவமனைக்கு அனுப்பி வைத்தனா். அங்கிருந்து மேல் சிகிச்சைக்காக வேலூா் அடுக்கம்பாறை அரசு மருத்துவக் கல்லூரியில் தீவிர பிரிவில் அனுமதிக்கப்பட்டு, சிகிச்சை பெற்று வந்த நிலையில், செவ்வாய்க்கிழமை உயிரிழந்தாா்.

இது குறித்து திம்மாம்பேட்டை போலீஸாா் வழக்குப் பதிந்து மேலும் விசாரணை நடத்தி வருகின்றனா்.