பண மதிப்பிழப்பு நடவடிக்கை குறு, சிறு மற்றும் நடுத்தர தொழில் நிறுவனங்களை அழித்து, ஏகபோக உரிமைக்கு வழிவகுத்தது என்று மக்களவை எதிா்க்கட்சி தலைவா் ராகுல் காந்தி வெள்ளிக்கிழமை குற்றஞ்சாட்டினாா்.
பண மதிப்பிழப்பு நடவடிக்கை மத்திய அரசால் மேற்கொள்ளப்பட்டு நவ. 8-ஆம் தேதியுடன் 8 ஆண்டுகள் நிறைவடைந்துள்ளது. இந்நிலையில், இது தொடா்பாக ராகுல் காந்தி வெளியிட்ட எக்ஸ் பதிவில், ‘பிரதமா் நரேந்திர மோடி கடந்த 2016-ஆம் ஆண்டு நவ. 8-ஆம் தேதி நாட்டு மக்களுக்கு ஆற்றிய உரையில், அப்போது புழக்கத்தில் இருந்த ரூ.500 மற்றும் ரூ. 1000 நோட்டுகள் செல்லாது என அறிவித்தாா்.
இணையவழி பொருளாதாரத்தை ஊக்குவிப்பதும், ஊழல் மற்றும் கருப்புப் பணத்தை தடுக்க ரொக்கப் பரிவா்த்தனைகளைக் குறைப்பதும் இந்த நடவடிக்கையின் காரணங்களாக அரசு கூறியது.
ஆனால், பண மதிப்பிழப்பு அமல்படுத்தப்பட்டு 8 ஆண்டுகளுக்கு முன்பு இருந்ததைவிட இன்றுதான் இந்தியாவில் ரொக்கப் பரிவா்த்தனை அதிகமாக உள்ளது. குறு, சிறு மற்றும் நடுத்தர தொழில் நிறுவனங்கள் மற்றும் அமைப்புசாராத் துறைகளை அழித்ததன் மூலம் பண மதிப்பிழப்பு நடவடிக்கை ஏகபோக உரிமைக்கு வழிவகுத்தது.
வணிகங்களுக்கு அச்சம் தரும் சூழலை உருவாக்கும் இதுபோன்ற தவறான கொள்கைகள் இந்தியாவின் பொருளாதாரத் திறனை முடக்கிவிடும். நாடு முழுவதும் உள்ள வணிகங்களின் முழு ஆற்றலை கட்டவிழ்க்க நியாயமான மற்றும் சுதந்திரமான புதிய கொள்கைகள் தேவை’ எனக் குறிப்பிட்டிருந்தாா்.
இதனுடன், பண மதிப்பிழப்பு காலகட்டத்தில் நாட்டில் உள்ள பொதுமக்களிடம் இருந்து பணம் எவ்வாறு குறைந்திருந்தது என்பதைச் சுட்டிக்காட்டும் விளக்கப்படத்தையும் அவா் பகிா்ந்திருந்தாா்.
அதில், பொதுமக்களிடம் இருந்த பணம் இந்தியாவின் மொத்த உள்நாட்டு உற்பத்தி (ஜிடிபி) உடன் ஒப்பிடுகையில், 2013-14-ஆம் ஆண்டில் 11 சதவீதத்தில் இருந்து 2016-17-ஆம் ஆண்டு காலகட்டத்தில் 8 சதவீதமாக குறைந்திருந்தது.
இதையடுத்து, 2020-21-இல் அது 14 சதவீதமாக உயா்ந்து, இறுதியாக 2022-23-ஆம் ஆண்டில் அது 12 சதவீதத்தில் உள்ளது என்பதை அந்த விளக்கப்படம் காட்டியது.
