`ஓங்கி ஒலிக்கும் அதிகாரப் பகிர்வு முழக்கம் - திமுக, அதிமுக-வுக்கு நெருக்கடியா?’

தி.மு.க தொடங்கி த.வெ.க வரை 2026 சட்டமன்ற தேர்தல் வேலைகளை தொடங்கிவிட்டனர். இச்சூழலில் `ஆட்சி அதிகாரத்தில் பங்கு, கூட்டணி ஆட்சி’ போன்ற முழக்கங்களை பல்வேறு அரசியல் கட்சிகள் முன்வைக்கின்றன. இவ்விவகாரம் கூட்டணிக்கு தலைமை தாங்கும் தி.மு.க மற்றும் அ.தி.மு.க-வை நெருக்கடிக்குள்ளாக்குமா என்ற கேள்வி எழுந்திருக்கிறது.

நம்மிடம் பேசிய அரசியல் விவரமறிந்தவர்கள், ``கூட்டணிக் கட்சிகளுக்கு ஆட்சி அதிகாரத்தில் பங்கு கொடுக்க வேண்டுமென்ற கோரிக்கையை பற்ற வைத்தது விடுதலை சிறுத்தைகள் கட்சியும் காங்கிரஸும்தான். வி.சி.க-வின் முன்னாள் நிர்வாகி ஆதவ் அர்ஜூனா `மாநிலக் கட்சி அங்கீகாரம் பெற்ற எங்கள் கட்சி அதிகாரம் நோக்கியும் நகரும்’ என நாடாளுமன்றத் தேர்தலுக்கு பின்னர் பேசினார். பிறகு கடந்த் ஜூலை மாதம், ``கூட்டணி தர்மம் என்று கூறி கூனி, குறுகி இருக்கக் கூடாது. 2026-ம் ஆண்டு தமிழக அமைச்சரவையில் காங்கிரஸ் இடம் பெற வேண்டும்" என்று பேச ஆரம்பித்தனர் சில காங்கிரஸ் நிர்வாகிகள்.

தொடர்ந்து பா.ஜ.க, தங்கள் தலைமையிலான தேசிய ஜனநாயகக் கூட்டணி 2026-ல் கூட்டணி ஆட்சி அமைக்கும் எனச் சொல்ல, பா.ம.க-வோ நாங்கள் இடம்பெறும் கூட்டணி, கூட்டணி ஆட்சியமைக்கும் என்றது. இதற்கிடையில் புதிதாக கட்சி ஆரம்பித்து மாநாடு நடத்திய நடிகர் விஜய், `ஆட்சி அதிகாரத்தில் பங்கு கொடுப்போம்’ என பற்றவைத்தார். ஒருவகையில் கூட்டணி கட்சிகளுக்கு அமைச்சரவை பங்களிப்பு தர வேண்டும் என்ற கோரிக்கை துளிர்த்திருப்பது ஆரோக்கியமானது என்ற கருத்து இருந்தாலும் இக்கோரிக்கைகள் இடம்பெறுவதையே தி.மு.க மற்றும் அ.தி.மு.க விரும்பவில்லை என்பது ஓப்பனாகவே தெரிந்தது.

அ.தி.மு.க முன்னாள் அமைச்சர் செல்லூர் ராஜூ `ஆட்சி அதிகாரத்தில் பங்கு என்ற பேச்சுக்கே இடமில்லை’ என்றிருக்கிறார். இந்த கருத்தை வலியுறுத்திய பேசிய ஆதவ் அர்ஜூனாவின் பேச்சுக்கு நடவடிக்கை எடுக்க வேண்டுமென்றது தி.மு.க தரப்பு. ஆகவே தனிப் பெரும்பான்மை கிடைக்காத நிலை ஏற்பட்டால்தான் தமிழ்நாட்டில் கூட்டணி ஆட்சி நடைபெற வாய்ப்பிருக்கிறது” என்றனர்.

``அதிகாரப் பகிர்வு கோரிக்கையை நிறைவேற்ற இரு திராவிடக் கட்சிகளும் விரும்பவில்லை என்றாலும் அதிகாரத்தை பகிர்ந்தளிக்க வேண்டிய நிர்பந்தம் ஏற்படலாம்” என்கிறார்கள் அரசியல் நோக்கர்கள். தொடர்ந்து பேசியவர்கள் ``வலுவான கூட்டணி அமைக்க இயலாத அ.தி.மு.க, அதிகாரப் பகிர்வு கோரிக்கையை ஓர் ஆயுதமான பயன்படுத்தலாம்.

நடிகர் விஜய்யை கூட்டணிக்குள் கொண்டு வரவும், பா.ஜ.க-வுடன் இருக்கும் பா.ம.க-வையோ, தி.மு.க-வுடன் இருக்கும் வி.சி.க-வையோ தன் கூட்டணிக்குள் கொண்டு வர கூட்டணி ஆட்சி கோரிக்கைக்கு இசைவளிக்கலாம். விஜய், அ.தி.மு.க கூட்டணி கணக்குகள் எடுபட்டு தி.மு.க கூட்டணி சிதறும் சூழல் ஏற்பட்டால் தி.மு.ககூட அதிகாரத்தை பகிர்ந்தளிக்க முன்வரலாம்.

திமுக, அதிமுகவுக்கு இந்த ஆட்சியில் பங்கு முழக்கம் தற்போது சிறு நெருக்கடியை ஏற்படுத்தி இருப்பது உண்மை தான். காரணம், `ஆட்சியில் பங்கு தர முடியாது’ என்று சொல்வதற்கான காரணங்கள் வலுவாக இல்லை. தேர்தல் நெருக்கத்தில், இந்த இரு கட்சிகளில் ஒரு கட்சி, வலுவாக வெற்றி பெறுவோம் என்ற நம்பிக்கை கொள்ளும் எனில், ஆட்சியில் பங்கு எனும் கோரிக்கையை நிராகரிக்கலாம். ஆனால் கூட்டணி இன்றி வெற்றி சாத்தியம் இல்லை என நிலவரம் சென்றால், இந்த நெருக்கடிக்கு பணிய வேண்டிய நிர்ப்பந்தம் ஏற்படும்.

அரசியல் எதுவும் சாத்தியம் என்பதுபோல மீதமிருக்கும் 15 மாதங்களில் தமிழ்நாடு அரசியல் நகர்வுகளில் கூட்டணி ஆட்சி கோரிக்கை என்ன தாக்கம் ஏற்படுத்தும் என்பது தெரியவரும்” என்றனர்!

2026 தேர்தல் கவுண்டவுன் ஸ்டார்ட்ஸ்!