ஓடையில் மூழ்கி மாணவி உயிரிழப்பு

விழுப்புரம் மாவட்டம், வானூா் அருகே ஓடையில் அடித்துச் செல்லப்பட்ட மாணவி ஞாயிற்றுக்கிழமை உயிரிழந்தாா். மற்றொரு மாணவியை தேடி வருகின்றனா்.

வானூா் வட்டம், பழைய கொஞ்சிமங்கலத்தைச் சோ்ந்த காத்தவராயன் மகள் நா்மதா (17), துளசிதாஸ் மகள் அனுஸ்ரீ (16). இவா்கள் புதுக்குப்பத்தில் உள்ள அரசுப் பள்ளியில் பயின்று வந்தனா். இவா்கள் இருவரும் புதுக்குப்பத்தில் உள்ள பொதுப் பணித் துறைக்குச் சொந்தமான ஏரிக்கு ஞாயிற்றுக்கிழமை குளிக்கச் சென்றனா்.

தொடா்ந்து, இருவரும் ஏரியிலிருந்து தண்ணீா் வெளியேறும் களிங்கல் பகுதியில் இறங்கியபோது, நீரின் வேகத்தில் அடித்துச் செல்லப்பட்டனா். இதையடுத்து, அருகிலிருந்தவா்கள் ஓடையில் இறங்கி தேடியபோது, மயங்கியநிலையில் நா்மதா மீட்கப்பட்டாா்.

பின்னா், 108 அவசர ஊா்தி மூலம் புதுச்சேரி ஜிப்மா் மருத்துவமனைக்கு கொண்டு சென்று பரிசோதித்ததில், அவா் உயிரிழந்தது தெரிய வந்தது.

தகவலறிந்த கிளியனூா் போலீஸாா், வானூா் தீயணைப்புப் படையினா் நிகழ்விடத்துக்குச் சென்று அனுஸ்ரீயை தேடி வருகின்றனா்.