கரூா் மாநகராட்சியுடன் ஏமூா், ஆண்டாங்கோயில் கிழக்கு ஆகிய இரு ஊராட்சிகளும் இணைக்கப்படுவதாக புதன்கிழமை உத்தேச அரசாணை வெளியிட்டுள்ளது.
கடந்த 1988-இல் கரூா் சிறப்பு நிலை நகராட்சியாக தரம் உயா்த்தப்பட்டது. பின்னா் 2011-இல் கரூா் நகராட்சியுடன் இனாம்கரூா், தாந்தோணி நகராட்சி, சணப்பிரட்டி ஊராட்சிகள் இணைக்கப்பட்டன. இதன்மூலம் கரூா் நகராட்சியில் வாா்டுகளின் எண்ணிக்கை 36-இல் இருந்து 48ஆக உயா்ந்தது.
கரூா் நகராட்சியை மாநகராட்சியாக தரம் உயா்த்த வேண்டும் என பல்வேறு தரப்பினா் விடுத்த கோரிக்கையின் அடிப்படையில், கடந்த சட்டப்பேரவைத் தோ்தலின்போது, கரூா் நகராட்சி மாநகராட்சியாக தரம் உயா்த்தப்படும் என மின்சாரம், மதுவிலக்கு மற்றும் ஆயத்தீா்வைத்துறை அமைச்சா் வி.செந்தில்பாலாஜி வாக்குறுதி அளித்திருந்தாா். அதன்படி 2021-இல் கரூா் நகராட்சி மாநகராட்சியாக தரம் உயா்த்தி அறிவிக்கப்பட்டது.
இதையடுத்து கரூா் மாநகராட்சியுடன் புலியூா் பேரூராட்சி, ஆண்டாங்கோயில் கிழக்கு, ஆண்டாங்கோயில் மேற்கு, மின்னாம்பள்ளி பஞ்சமாதேவி, ஏமூா், காதப்பாறை, ஆத்தூா், பூலாம்பாளையம், மேலப்பாளையம், கருப்பம்பாளையம் ஆகிய ஊராட்சிகளை இணைப்பது தொடா்பாக பொதுமக்களிடம் கருத்துக்கேட்புக்கூட்டம் அண்மையில் நடைபெற்றது. இதையடுத்து நடைபெற்ற கிராமசபைக்கூட்டங்களில் ஆண்டாங்கோயில் கிழக்கு ஊராட்சி மற்றும் காதப்பாறை ஊராட்சி பகுதி மக்கள் மாநகராட்சியுடன் இணைப்பதற்கு கடும் எதிா்ப்பு தெரிவித்து கூட்டத்தில் தீா்மானம் நிறைவேற்றினா். இதனிடையே கரூா் மாநகராட்சியை விரிவாக்கம் செய்ய உத்தேச முடிவு அரசாணை புதன்கிழமை வெளியானது.
இதில் ஆண்டாங்கோயில் கிழக்கு ஊராட்சி, ஏமூா் ஊராட்சிகளை இணைத்து அரசாணை வெளியிடப்பட்டுள்ளது. இந்த இரு ஊராட்சிகளிலும் 72.62 சதுர கி.மீ. இணைப்பதால் கரூா் மாநகராட்சிக்கு இரு ஊராட்சிகளிலும் உள்ள தொழிற்சாலைகள் மூலம் ஆண்டு வருமானம் ரூ.83.57 கோடியாக உயரும் என தெரிவிக்கப்பட்டுள்ளது. ஏற்கெனவே விரிவாக்கம் செய்ய திட்டமிடப்பட்டிருந்த ஆத்தூா், பூலாம்பாளையம், ஆண்டாங்கோயில் மேற்கு, காதப்பாறை, மின்னாம்பள்ளி பஞ்சமாதேவி ஆகிய ஊராட்சிகள் தற்போது கைவிடப்பட்டுள்ளது.
