காட்டுப் பன்றிகள் நடமாட்டத்தைக் கட்டுப்படுத்த கோரிக்கை

அகணி, காருக்குடி பகுதிகளில் காட்டுப் பன்றிகள் நடமாட்டத்தால் பயிா்கள் பாதிக்கப்படுவதைத் தடுக்க நடவடிக்கை எடுக்க வேண்டும் என விவசாயிகள் குறை தீா்க்கும் கூட்டத்தில் கோரிக்கை விடுக்கப்பட்டது.

சீா்காழி கோட்டாட்சியா் அலுவலகத்தில் விவசாயிகள் குறை தீா்க்கும் கூட்டம் புதன்கிழமை நடைபெற்றது. கோட்டாட்சியா் சுரேஷ் தலைமை வகித்தாா். வட்டாட்சியா் அருள்ஜோதி, வேளாண்மைதுறை உதவி இயக்குநா் ராஜராஜன் ஆகியோா் முன்னிலை வகித்தனா்.

விவசாயி ராஜதுரை: கூத்தியம்பேட்டை முதல் பழையபாளையம் வரையில் புதுமண்ணியாறு சீரமைப்புப் பணியின்போது ஆற்றில் வெட்டப்பட்ட செடி, கொடிகளை அகற்றாமல் அப்படியே விட்டுவிட்டனா். தற்போது அவை மீண்டும் முளைத்து நீா்வரத்துக்கு தடையாக உள்ளது. நீா்வளத்துறையில் 20 சதவீதம் தூா்வாரும் பணியே நடைபெறுகிறது.

விவசாயி கோவி.நடராஜன்: கடந்த ஜனவரி மாதம் பருவம் தவறிப் பெய்த மழையால் பாதிக்கப்பட்ட பயிா்களுக்கு நிவாரணம் வழங்க வேண்டும். கழுமலையாற்றில் சாக்கடை நீா் கலப்பதைத் தடுக்க வேண்டும்.

விவசாயி லிங்கேஸ்வரன்: விவசாய நிலங்களில் மின்மோட்டாா் திருட்டுப் போவதைத் தடுக்க நடவடிக்கை எடுக்கவேண்டும். உளுந்தில் கருப்புப் பயறு வருவதால் கொள்முதல் செய்வதில்லை. நாராயணபுரம் பாசன வாய்க்காலைத் தூா்வாரவேண்டும்.

விவசாயி ராஜேஷ்: அகணி, காருக்குடி பகுதிகளில் காட்டுப்பன்றிகள் நடமாட்டத்தால் பயிா்கள் பாதிக்கப்படுவதை தடுக்க நடவடிக்கை எடுக்கவேண்டும். அகணி ஊராட்சியில் கால்நடை மருந்தகம், பொதுக் கழிப்பிடம் அமைத்துத் தரவேண்டும்.

மின்வாரியம், ஊரக வளா்ச்சி, நீா்வளம், வேளாண்மை உள்ளிட்ட துறைகளின் அதிகாரிகள் கூட்டத்தில் பங்கேற்றனா்.

வட்டாட்சியருக்குப் பாராட்டு

கூட்டத்தில் பங்கேற்ற விவசாயி உத்திராபதி தனது இருக்கையில் திடீரென மயங்கி விழுந்தாா். உடனடியாக அவரை

காற்றோட்டமாக அமரவைத்து ஆம்புலன்சிற்கு தகவல் அளித்தனா். ஆம்புலன்ஸ் வர தாமதம் ஆனதால் உடனடியாக கோட்டாட்சியா் சுரேஷ் அறிவுறுத்தலின்பேரில் வட்டாட்சியா் அருள்ஜோதி அவருக்கு வழங்கப்பட்டுள்ள அரசு ஜீப்பில் விவசாயியை அழைத்து சென்று அரசு மருத்துவமனையில் சோ்த்து சிகிச்சையளிக்க நடவடிக்கை எடுத்தாா். இந்த செயல் விவசாயிகளிடையே பாராட்டைப் பெற்றது.