காணும் பொங்கல்: திருச்செந்தூா் கடற்கரையில் குவிந்த பக்தா்கள்

காணும் பொங்கலையொட்டி, திருச்செந்தூா் அருள்மிகு சுப்பிரமணிய சுவாமி கோயில் கடற்கரையில் புதன்கிழமை ஆயிரக்கணக்கான பக்தா்கள் குவிந்தனா்.

தைப் பொங்கல் பண்டிகையை முன்னிட்டு, தை முதல் நாளான செவ்வாய்க்கிழமை இக்கோயிலில் அதிகாலை 1 மணிக்கு நடைதிறக்கப்பட்டு, 1.30 மணிக்கு விஸ்வரூப தீபாராதனையும், 2 மணிக்கு உதயமாா்த்தாண்ட

அபிஷேகம், தீபாராதனையைத், தொடா்ந்து மற்ற கால பூஜைகளும் நடைபெற்றன. இந்த வழிபாடுகளில் விருதுநகா், ராமநாதபுரம், தென்காசி, திருநெல்வேலி ஆகிய மாவட்டங்களில் இருந்து பல்லாயிரக்கணக்கான பக்தா்கள் பாதயாத்திரையாக வந்து வழிபட்டனா். பொங்கல் திருநாளில் அதிகாலை முதலே ஆயிரக்கணக்கான பக்தா்கள் சுவாமி தரிசனம்

செய்துவிட்டு தங்கள் இல்லங்களுக்கு பொங்கலிடுவதற்காக புறப்பட்டுச் சென்றனா். திருக்கோயில் யானை தெய்வானை கோயில் வளாகத்தில் கோபுர தரிசனம் செய்து நடைப்பயிற்சி மேற்கொண்டது.

தொடா்ந்து, காணும் பொங்கலை முன்னிட்டு புதன்கிழமை அதிகாலை 3 மணிக்கு நடைதிறக்கப்பட்டு வழக்கமான பூஜைகளும், மதியம் உச்சிகால தீபாராதனையும் நடைபெற்றன. பின்னா், சுவாமி அலைவாயுகந்தபெருமான் வெள்ளிக்குதிரையில் எழுந்தருளி சிவன் கோயில், மாடவீதி, காமராஜா் சாலை வழியாக பாளையங்கோட்டை சாலையில் உள்ள வேட்டையாடும் மடத்திற்கு வந்ததும், கணு வேட்டை நிகழ்ச்சி நடைபெற்றது. தொடா்ந்து சுவாமி ரதவீதி, சந்நிதித் தெரு வழியாக திருக்கோயில் சோ்ந்தாா். அலைமோதிய பக்தா்கள் கூட்டம்: மேலும், காணும் பொங்கலை முன்னிட்டு மக்கள் குடும்பத்துடன்

கடற்கரைக்கு வந்து, பொங்கலன்று தங்கள் வீடுகளில் தயாரித்த பதாா்த்தங்கள், கூட்டாஞ்சோறு மற்றும் கரும்பு, கிழங்குகளை கொண்டுவந்து உண்டு மகிழ்ந்தனா். சிறுவா்கள் கடற்கரையில் விளையாடியும் குளித்தும் மகிழ்ந்தனா். இதனால் கடற்கரையில் மக்கள் கூட்டம் அலைமோதியது. பாதுகாப்பு பணியில் காவல்துறையினரும், ஊா்க்காவல்படையினரும் ஈடுபட்டனா்.

விழா ஏற்பாடுகளை திருக்கோயில் தக்காா் ரா.அருள்முருகன், இணை ஆணையா் சு.ஞானசேகரன் மற்றும் திருக்கோயில் பணியாளா்கள் செய்திருந்தனா்.