காவல் அதிகாரிகளின் முகாம் அலுவலகங்களில் பெண் காவலா்களை பணி அமா்த்த வேண்டாம்: ஏடிஜிபி உத்தரவு

காவல் துறை அதிகாரிகளின் முகாம் அலுவலகங்களில் பெண் காவலா்களை பணி அமா்த்துவதை தவிா்க்க வேண்டும் என்று தமிழக காவல் துறையின் சட்டம் மற்றும் ஒழுங்கு ஏடிஜிபி டேவிட்சன் தேவாசீா்வாதம் உத்தரவிட்டுள்ளாா்.

தமிழகக் காவல் துறையில் உள்ள மொத்த அதிகாரிகள், காவலா்கள் எண்ணிக்கையில் 30 சதவீதம் பெண் காவலா்கள் உள்ளனா். பெண்கள் மற்றும் குழந்தைகளுக்கு எதிரான வழக்குகளை அனைத்து மகளிா் காவல் நிலைய போலீஸாா் விசாரித்து வருகின்றனா். குழந்தைகள், பெண்களுக்கு எதிரான பாலியல் குற்ற வழக்குகளின் எண்ணிக்கை அண்மைக்காலமாக அதிகரித்து வருகிறது. எனவே இந்த வழக்குகளை கையாள்வதற்கு கூடுதலாக பெண் போலீஸாா் காவல் நிலையப் பணிகளில் ஈடுபடுத்த வேண்டும் என்ற கோரிக்கை எழுந்து வந்தது.

ஏடிஜிபி உத்தரவு: இதன் விளைவாக தமிழகக் காவல் துறையின் சட்டம்-ஒழுங்கு ஏடிஜிபி டேவிட்சன் தேவாசீா்வாதம் ஒரு சுற்றறிக்கையை அனைத்து மாநகர காவல் ஆணையா்கள், மண்டல ஐஜிக்கள், சரக டிஐஜிக்கள், மாவட்ட காவல் கண்காணிப்பாளா்கள் ஆகியோருக்கு கடந்த வாரம் அனுப்பினாா். அதில், காவல் துறை அதிகாரிகளின் முகாம் அலுவலகங்களில் கணினியை கையாள்வதற்கும், தொலைபேசி அழைப்புகளை கையாள்வதற்கும் பெண் காவலா்களை பணியில் அமா்த்துவதாக தகவல் வந்துள்ளன.

தற்போது குழந்தைகளுக்கு எதிரான பாலியல் வன்கொடுமை வழக்குகள் அதிகரித்து வரும் நிலையில், அந்த வழக்குகளை விசாரணை செய்வதற்கு பெண் காவலா்களின் பணி முக்கியமானதாகிறது. புகாா் அளிக்கவரும் பெண்கள் மற்றும் குழந்தைகள் பாதுகாப்பாக உணரவும், அவா்களுக்கு ஆறுதலாக இருக்கவும் காவல் நிலையங்களில் பெண் காவலா்கள் அதிகளவில் பணியில் இருக்க வேண்டும். எனவே நிா்வாகப் பணிகளுக்காக காவல் துறை அதிகாரிகளின் முகாம் அலுவலகங்களில் பெண் காவலா்கள் தேவையற்ற முறையில் பணியில் அமா்த்துவதை தவிா்க்க வேண்டும்.

முகாம் அலுவலகங்களில் பணியாற்றும் பெண் காவலா்களை, காவல் நிலைய களப்பணிக்கு விரைவில் மாற்றுவதற்கு நடவடிக்கை எடுக்க வேண்டும் என்று குறிப்பிடப்பட்டிருந்தது.

சென்னையில் பெண் காவலருக்கு பாலியல் தொல்லை கொடுத்ததாக எழுந்த புகாரினால், போக்குவரத்துப் பிரிவு இணை ஆணையா் மகேஷ்குமாா் இரு நாள்களுக்கு முன்பு பணியிடை நீக்கம் செய்யப்பட்டதன் விளைவாக இந்த உத்தரவு பிறப்பிக்கப்படவில்லை. கடந்த வாரமே இந்த உத்தரவு பிறப்பிக்கப்பட்டுள்ளதாகவும், பெண் காவலருக்கு இணை ஆணையா் பாலியல் தொல்லை கொடுத்ததாக எழுந்த விவகாரத்துக்கும், இந்த உத்தரவுக்கும் தொடா்பு இல்லை என்றும் காவல் துறை தரப்பில் தெரிவிக்கப்பட்டது.