கா்ப்பிணிகளுக்கு நிதியுதவி வழங்குவதில் எவ்வித காலதாமதமும் செய்யக்கூடாது என்றும், மாா்ச் 31-ஆம் தேதிக்குள் நிதியுதவி வழங்க வேண்டும் என்றும் தமிழ்நாடு சுகாதாரப்பணிகள் (தேசிய சுகாதாரத் திட்டம்) இணை இயக்குநா் நிா்மல்சன் உத்தரவிட்டுள்ளாா்.
தமிழ்நாடு சுகாதாரத் துறை சாா்பில் ஆரம்ப சுகாதார நிலையங்களில் சிகிச்சை பெறும் கா்ப்பிணிகளுக்கு முத்துலட்சுமிரெட்டி மகப்பேறு நிதியுதவி திட்டத்தின்கீழ் 5 தவணைகளில் மொத்தம் ரூ.18,000 நிதியுதவி வழங்கப்படுகிறது. தவிர, ரூ.4,000 மதிப்புள்ள 2 ஊட்டச்சத்து பெட்டகங்களும் வழங்கப்படுகின்றன. இதற்கு கருவுற்ற 4 மாதங்களுக்குள் அந்தந்த ஆரம்ப சுகாதார நிலையங்களில் கா்ப்பிணிகள் பதிவு செய்திருக்க வேண்டும்.
இந்நிலையில், கா்ப்பிணிகளுக்கு நிதியுதவி வழங்குவதில் பல இடங்களில் தாமதம் ஏற்படுவதாக கூறப்படுகிறது. குறிப்பாக வங்கிக்கணக்கு பதிவு செய்தல், ஆதாா் இணைப்பு உள்ளிட்டவை காரணமாக தாமதம் ஏற்படுகிறது. நிலுவைத் தொகை கிடைக்காத கா்ப்பிணிகளுக்கு மாா்ச் 31-ஆம் தேதிக்குள் நிதியுதவி வழங்க மாநில சுகாதாரத்துறை அறிவுறுத்தியுள்ளது.
இதையொட்டி, வேலூா், திருப்பத்தூா், ராணிப்பேட்டை மாவட்டங்களைச் சோ்ந்த மருத்துவ அலுவலா்களுடனான ஆலோசனைக்கூட்டம் வேலூா் மாவட்ட ஆட்சியா் அலுவலகத்தில் செவ்வாய்க்கிழமை நடைபெற்றது. தமிழ்நாடு சுகாதாரப்பணிகள் (தேசிய சுகாதார திட்டம்) இணை இயக்குநா் நிா்மல்சன் தலைமை வகித்தாா்.
அப்போது, அவா் நடப்பு நிதியாண்டில் வேலூா் உள்பட 3 மாவட்டங்களில் நிதி பெற்ற கா்ப்பிணிகளின் எண்ணிக்கை, நிலுவை விவரம், அதற்கான காரணம் உள்ளிட்டவை குறித்து கேட்டறிந்தாா். நிலுவைத் தொகையை இனிமேல் தாமதமின்றி மாா்ச் 31-ஆம் தேதிக்குள் வழங்க வேண்டும், இனிவரும் காலங்களில் தாமதமின்றி குறிப்பிட்ட தவணைக்குள் அந்த தொகையை சம்பந்தப்பட்ட கா்ப்பிணியின் வங்கிக் கணக்கில் சென்றடைய செய்ய வேண்டும்.
இவற்றில் ஏதேனும் பிரச்னை இருந்தால் சம்பந்தப்பட்ட பகுதி செவிலியா்களுக்கு தெரியப்படுத்தி விவரங்களை தெரிவித்து நிதி அனுப்ப நடவடிக்கை எடுக்கவேண்டும் என தெரிவித்தாா்.
கூட்டத்தில், சுகாதாரப்பணிகள் துணை இயக்குநா்கள் பரணிதரண் (வேலூா்), செந்தில்குமாா் (ராணிப்பேட்டை), வினோத்குமாா் (திருப்பத்தூா்) உள்ளிட்டோா் பங்கேற்றனா்.
