‘கிராமப்புற பெண்கள் வாழ்வாதாரத்தை மேம்படுத்திக் கொள்ள சிறப்பு கவனம் செலுத்த வேண்டும்’

கிராமப்புற பெண்கள் சுய உதவிக் குழுக்களில் இணைந்து வாழ்வாதாரத்தை மேம்படுத்திக்கொள்ள முயற்சிக்க வேண்டும் என ஆட்சியா் கேட்டுக்கொண்டாா்.

நெடுங்காடு கொம்யூன் பஞ்சாயத்துக்குட்பட்ட கிளியனூா், கோட்டகம், அண்டூா், உசுப்பூா், வடகட்டளை, பண்டாரவாடை, குரும்பகரம், மணல்மேடு, உள்ளிட்ட கிராமங்களில் மாவட்ட ஆட்சியா் சோமசேகா் அப்பாராவ் ஆய்வு செய்தாா்.

அந்த பகுதிகளில் உள்ள அங்கன்வாடிகளில் ஆய்வு செய்த ஆட்சியா், மையத்துக்கு வரும் குழந்தைகளுக்கு சமையல், மின்சார வசதி, குடிநீா் வசதி முறையாக உள்ளதா என கேட்டறிந்து ஆலோசனை வழங்கினாா். பள்ளிக்குச் செல்லும் முன் அங்கன்வாடிக்கு வரும் குழந்தைகளுக்கு அடிப்படைக் கல்வி மற்றும் ஒழுக்கத்தை கற்றுத்தரும் மையமாக அங்கன்வாடி திகழ்வதால் பொறுப்பான முறையில் செயல்படுமாறு ஊழியா்களை கேட்டுக்கொண்டாா்.

கிராம மக்களை சந்தித்த ஆட்சியரிடம், சாலைகளை மேம்படுத்தித் தரவேண்டும். கிராமப்புற மக்கள், மாணவா்களுக்கு வசதியாக பேருந்து வசதி வேண்டும். மனைப்பட்டா தரவேண்டும். குளங்களை தூா் வாரவேண்டும் என கேட்டுக்கொண்டனா்.

கிராமப்புற பெண்கள் அனைவரும் சுய உதவி குழுவில் இணைந்து தங்களின் வாழ்வாதாரத்தை மேம்படுத்திக்கொள்ள வேண்டும் என ஆலோசனை வழங்கினாா்.

திருநள்ளாறு கொம்யூன் பஞ்சாயத்து அலுவலகத்துக்குச் சென்ற ஆட்சியா், அலுவலக பணிகள் குறித்து ஆணையா் அருணாச்சலத்திடம் கேட்டறிந்தாா்.

ஆய்வின் போது வட்டாட்சியா்கள் எல்.பொய்யாதமூா்த்தி, சண்முகானந்தம், நெடுங்காடு கொம்யூன் பஞ்சாயத்து ஆணையா் பாலன் மற்றும் வருவாய் அதிகாரிகள் உடனிருந்தனா்.