குடிநீா்த் தட்டுப்பாட்டை தீா்க்க கூடுதல் நீா்த்தேக்க தொட்டிகள்: மேயரிடம் மக்கள் மனு

திருநெல்வேலி மாநகரப் பகுதியில் நிலவி வரும் குடிநீா்த் தட்டுப்பாட்டை போக்க கூடுதலாக மேல்நிலை நீா்த்தேக்க தொட்டிகள் கட்ட வேண்டும் என மேயரிடம் மக்கள் மனு அளித்தனா்.

திருநெல்வேலி மாநகராட்சி அலுவலகத்தில் மக்கள் குறைதீா்க்கும் கூட்டம் மேயா் கோ.ராமகிருஷ்ணன் தலைமையில் செவ்வாய்க்கிழமை நடைபெற்றது. துணை மேயா் கே.ஆா்.ராஜு, உதவி ஆணையா் புரந்திரதாஸ் ஆகியோா் முன்னிலை வகித்தனா்.

இந்தக் கூட்டத்தில் 54 ஆவது வாா்டு மாமன்ற உறுப்பினா் கே.கே.கருப்பசாமி கோட்டையப்பன் அளித்த மனுவில், தனது வாா்டு பகுதிக்குள்பட்ட புகா் பகுதிகளில் மக்களுக்கு சீரான குடிநீா், புதிய குடிநீா் இணைப்பு கிடைத்திட 5 லட்சம் கொள்ளளவு கொண்ட புதிய மேல்நிலை நீா்தேக்க தொட்டி அமைக்கவும், 47 ஆவது வாா்டு மாமன்ற உறுப்பினா் ஷபி அமீா்பாத்து அளித்த மனுவில், தனது வாா்டு பூலி புதுத்தெருவில் பழைய சிமென்ட் சாலையை அகற்றி புதிய தாா்ச்சாலை அமைக்கவும் வலியுறுத்தப்பட்டிருந்தது.

திருநெல்வேலி நகரம் காவல்பிறை தெருவைச் சோ்ந்த நவநீதகிருஷ்ணன் அளித்த மனுவில், காவல்பிறை தெருவில் பாதாளச் சாக்கடையில் இருந்து வெளியேறும் கழிவுநீரை தடுக்கக் கோரியும், பழைய பேட்டை அழகப்பபுரம் நடுத்தெருவைச் சோ்ந்த மக்கள் அளித்த மனுவில், தங்கள் தெருவில் ஏற்பட்டுள்ள பாதாளச் சாக்கடை அடைப்பை நீக்கவும், மல்லிகா காலனியை சோ்ந்த சதீஷ்குமாா் அளித்த மனுவில், தங்கள் பகுதிக்கு சாலை வசதி ஏற்படுத்தி தரவும் கோரிக்கை விடுக்கப்பட்டிருந்தது. மனுவைப் பெற்ற மேயா் கோ.ராமகிருஷ்ணன், அவற்றின் மீது விரைந்து நடவடிக்கை எடுக்க அதிகாரிகளுக்கு உத்தரவிட்டாா்.