குடியரசுத் தலைவா் ஆட்சி அமல்: மணிப்பூா் முழுவதும் பலத்த பாதுகாப்பு

மணிப்பூரில் குடியரசுத் தலைவா் ஆட்சி அமலானதைத் தொடா்ந்து, மாநிலம் முழுவதும் பாதுகாப்பு பலப்படுத்தப்பட்டுள்ளது.

சட்டப் பேரவை முடக்கி வைக்கப்பட்டுள்ள நிலையில், பாஜக தலைமையின் அடுத்தகட்ட நடவடிக்கை குறித்து எதிா்பாா்ப்பு எழுந்துள்ளது.

வடகிழக்கு மாநிலமான மணிப்பூரில் என்.பிரேன் சிங் தலைமையில் பாஜக ஆட்சி நடைபெற்று வந்தது. முதல்வா் பதவியில் இருந்து அவா் கடந்த ஞாயிற்றுக்கிழமை விலகியதை அடுத்து, புதிய முதல்வரை முடிவு செய்வதில் கருத்தொற்றுமை எட்டப்படாமல் 4 நாள்களாக இழுபறி நீடித்தது. இந்தச் சூழலில், மணிப்பூரில் வியாழக்கிழமை குடியரசுத் தலைவா் ஆட்சி அமல்படுத்தப்பட்டது.

இது தொடா்பாக மத்திய உள்துறை அமைச்சகம் வெளியிட்ட அறிவிக்கையில், ‘மணிப்பூரில் அரசமைப்புச் சட்ட பிரிவுகளின்கீழ் மாநில அரசு தொடா்ந்து செயல்பட முடியாத சூழல் உருவாகியுள்ளதால், அரசமைப்புச் சட்டப் பிரிவு 356-இன்கீழ் தனக்கு அளிக்கப்பட்ட அதிகாரங்களைப் பயன்படுத்தி, மணிப்பூா் அரசின் அனைத்து செயல்பாடுகள் மற்றும் மாநில ஆளுநரின் அனைத்து அதிகாரங்களையும் குடியரசுத் தலைவா் ஏற்றுள்ளாா்’ என்று தெரிவிக்கப்பட்டது.

மாநிலப் பேரவையின் பதவிக் காலம் 2027-ஆம் ஆண்டுவரை உள்ள நிலையில், அது முடக்கி வைக்கப்பட்டது.

தற்போதைய அரசியல் சூழலைப் பயன்படுத்தி, சமூக விரோதிகள் அசம்பாவித சம்பவங்களில் ஈடுபடலாம் என்பதால், தலைநகா் இம்பால் உள்பட மாநிலம் முழுவதும் பாதுகாப்பு பலப்படுத்தப்பட்டுள்ளது. ஆளுநா் மாளிகை, தலைமைச் செயலகம் உள்ளிட்டவை பாதுகாப்பு வளையத்தில் கொண்டுவரப்பட்டுள்ளன.

இனமோதலின் பின்னணி:

மணிப்பூரில் பெரும்பான்மையாக உள்ள மைதேயி சமூகத்தினருக்கும், குகி பழங்குடியினருக்கும் கடந்த 2023, மே மாதம் பெரும் கலவரம் மூண்டது. மைதேயி சமூகத்தினா் தங்களுக்கு பழங்குடியின அந்தஸ்து கோரும் நிலையில், அதற்கு குகி பழங்குடியினா் எதிா்ப்பு தெரிவிப்பதே மோதலுக்கு பிரதான காரணமாகும்.

கடந்த 21 மாதங்களாக அவ்வப்போது நிகழும் வன்முறைச் சம்பவங்களில் இதுவரை 250-க்கும் மேற்பட்டோா் உயிரிழந்துவிட்டனா். மாநிலத்தில் அமைதியை மீட்டெடுக்கத் தவறிய பிரேன் சிங், முதல்வா் பதவியில் இருந்து விலக வேண்டுமென காங்கிரஸ் உள்ளிட்ட எதிா்க்கட்சிகள் வலியுறுத்தி வந்தன. அத்துடன், பிரேன் சிங் தலைமை மீது பாஜக எம்எல்ஏக்களில் ஒரு பிரிவினரும் அதிருப்தியை வெளிப்படுத்திய நிலையில், அவா் தனது பதவியை ராஜிநாமா செய்து, மாநில ஆளுநா் அஜய் குமாா் பல்லாவிடம் கடந்த ஞாயிற்றுக்கிழமை கடிதம் அளித்தாா்.

புதிய முதல்வரை தோ்வு செய்ய பாஜகவின் வடகிழக்கு பிராந்திய பொறுப்பாளா் சம்பித் பத்ரா கட்சி எம்எல்ஏக்களுடன் பல சுற்று பேச்சுவாா்த்தைகள் நடத்தினாா். எனினும், கருத்தொற்றுமை எட்டப்படாத நிலையில், குடியரசுத் தலைவா் ஆட்சி அமலானது.

பெட்டிச் செய்தி...1

களநிலவரத்தைப் பொறுத்து பேரவை முடக்கம் நீக்கப்படும்: பாஜக

‘மணிப்பூரில் கள நிலவரத்தைக் கருத்தில் கொண்டு, பேரவை முடக்கம் நீக்கப்படும்’ என்று பாஜக தெரிவித்துள்ளது.

இது தொடா்பாக அக்கட்சியின் வடகிழக்கு பிராந்திய பொறுப்பாளா் சம்பித் பத்ரா கூறுகையில், ‘மணிப்பூரில் அமைதி, இயல்பு நிலையை மீட்டெடுக்கும் முயற்சிகளைத் தொடர பாஜக உறுதிபூண்டுள்ளது. பேரவை முடக்கப்பட்டுள்ளதே அன்றி, கலைக்கப்படவில்லை. மீண்டும் புதிய அரசு அமைக்க வாய்ப்புள்ளது என்பதே இதன் பொருள். மணிப்பூரில் கள நிலவரத்தைக் கருத்தில் கொண்டு, பேரவை முடக்கம் நீக்கப்படும்’ என்றாா்.

பெட்டிச் செய்தி...2

பிரதமா் மன்னிப்பு கேட்க வேண்டும்: காா்கே

-

புது தில்லி, பிப். 14: ‘மணிப்பூரில் தனது சொந்த கட்சியின் அரசையே முடக்கி, குடியரசுத் தலைவா் ஆட்சியை அமல்படுத்தியுள்ளது மோடி அரசு; இந்த தோல்விக்காக, மணிப்பூா் மக்களிடம் அவா் மன்னிப்பு கேட்க வேண்டும்’ என்று காங்கிரஸ் தலைவா் மல்லிகாா்ஜுன காா்கே வலியுறுத்தியுள்ளாா்.

இது தொடா்பாக அவா் வெளியிட்ட எக்ஸ் பதிவில், ‘மணிப்பூரில் அரசமைப்புச் சட்ட பிரச்னை எழுந்ததால், குடியரசுத் தலைவா் ஆட்சியை அமல்படுத்த வேண்டிய கட்டாயம் பாஜகவுக்கு ஏற்பட்டது. இது, பிரதமா் மோடியின் திறனின்மைக்கு சாட்சியாகும். பாஜகவின் இரட்டை என்ஜின், அப்பாவி மக்களின் வாழ்வை அழித்துள்ளது’ என்று தெரிவித்துள்ளாா்.