குன்னூா் அருகே மரம் விழுந்து மின்மாற்றி சேதம்

குன்னூா்-மேட்டுப்பாளையம் தேசிய நெடுஞ்சாலையில் பெரிய மரம் விழுந்ததில் மின்மாற்றி (டிரான்ஸ்ஃபாா்மா்) வெள்ளிக்கிழமை சேதமடைந்தது.

நீலகிரி மாவட்டத்தில் கனமழைக்கு வாய்ப்புள்ளதாக வானிலை ஆய்வு மையம் தெரிவித்திருந்த நிலையில் உதகை, குன்னூா், கோத்தகிரி உள்ளிட்ட பகுதிகளில்  வெள்ளிக்கிழமை காலை முதலே மேகமூட்டத்துடன் பரவலாக  மழை பெய்தது. இதனால் குளிரின் தாக்கம் அதிகரித்துக் காணப்பட்டது.

மழை மற்றும் கடும் குளிரால் பள்ளி செல்லும் மாணவ, மாணவிகள்,  தோட்ட வேலைக்குச் செல்வோா் மிகுந்த சிரமத்துக்குள்ளாகினா். பொதுமக்களின் இயல்பு வாழ்க்கை வெகுவாக பாதிக்கப்பட்டது.

குன்னூா்-மேட்டுப்பாளையம் தேசிய நெடுஞ்சாலையில் பெரிய மரம் முறிந்து மின்மாற்றி மீது விழுந்ததில் மின்மாற்றி சேதமடைந்து சாய்ந்தது. இதை சீா் செய்யும் பணியில் குன்னூா் மின்வாரிய ஊழியா்கள் ஈடுபட்டனா்.

தொடா் மழை காரணமாக உதகை-குன்னூா் இடையே மலை ரயில் சேவை வெள்ளி மற்றும் சனிக்கிழமை (டிசம்பா் 13,14) என இரண்டு நாள்களுக்கு ரத்து செய்யப்படுவதாக ரயில்வே நிா்வாகம் தெரிவித்துள்ளது.