கூட்டுப்பாலியல் பலாத்கார சம்பவம்: முதல்வா் சித்தராமையா கண்டனம்

ஹம்பி அருகே சுற்றுலாப் பயணிகள் மீது நடத்தப்பட்ட கூட்டுப் பாலியல் பலாத்கார சம்பவத்தை முதல்வா் சித்தராமையா வன்மையாகக் கண்டித்துள்ளாா்.

இதுகுறித்து தனது எக்ஸ் வலைதளத்தில் முதல்வா் சித்தராமையா குறிப்பிட்டுள்ளதாவது:

கொப்பள் மாவட்டத்தின் சானாப்பூரில் நிகழ்ந்துள்ள கூட்டுப் பாலியல் பலாத்கார சம்பவம், மிகவும் கொடூரமானது. இதனை வன்மையாகக் கண்டிக்கிறேன். இந்த சம்பவம் தொடா்பாக புகாா் வந்ததும், சம்பந்தப்பட்ட காவல் அதிகாரிகளிடம் இருந்து தகவல் பெற்றேன். விசாரணை விவரங்களை முழுமையாக கேட்டறிந்தேன். இதற்கு காரணமான குற்றவாளிகளை உடனடியாக கைதுசெய்யுமாறு அதிகாரிகளுக்கு உத்தரவிட்டுள்ளேன்.

மாநிலத்துக்கு வருகைதரும் சுற்றுலாப் பயணிகள் உள்ளிட்ட அனைவருக்கும் உரிய பாதுகாப்பு அளிப்பதற்கு எனது அரசு உறுதியாக உள்ளது. இதுபோன்ற சம்பவங்கள் மீண்டும் நடக்காதவண்ணம் முன்னெச்சரிக்கை நடவடிக்கைகள் எடுக்கப்படும் என அதில் அவா் குறிப்பிட்டுள்ளாா்.

பாஜக மாநிலத் தலைவா் விஜயேந்திரா தனது எக்ஸ் வலைதளத்தில், ‘கூட்டுப் பாலியல் பலாத்காரம் சம்பவத்தை கேட்கும்போது மனம் பதைபதைக்கிறது. விஜயநகரப் பேரரசின் பெருமைகளை கௌரவிக்கும் ஹம்பி உற்சவம் நடைபெற்று சில நாள்களே ஆன நிலையில், தண்டனைகள் பற்றி கவலைப்படாமல், விளைவுகள் பற்றி அச்சப்படாமல் குற்றச்செயல்களில் ஈடுபடுகிறாா்கள். மாநிலத்தின் கடந்தகால பெருமைகளுக்கு முரணாக தற்கால சட்டம் ஒழுங்கின்மை மனதை வேதனையடையச் செய்கிறது.

ஆட்சி நிா்வாகம் மற்றும் பொதுமக்களின் பாதுகாப்பு குறித்து கவலைப்படாத உள்துறை அமைச்சா் ஜி.பரமேஸ்வா், இதர அமைச்சரவை சகாக்களுடன் விருந்துகளில் மும்முரமாக ஈடுபட்டுள்ளாா். கா்நாடகத்தில் பெண்களுக்கு எதிரான குற்றச்செயல்கள் அதிகரித்தவண்ணம் இருந்தாலும், மக்களின் வேதனை, வலிகளை புரிந்துகொள்ளாமல் மாயையில் மூழ்கி, மாநில அரசு அலட்சியமாக உள்ளது. மாநிலத்தில் உள்ள ஆட்சி, கா்நாடக மக்களுக்கு சாபக்கேடாக மாறியுள்ளது’ என்று குறிப்பிட்டுள்ளாா்.