கொடைக்கானலில் சீசனையொட்டி சுற்றுலாப் பயணிகளுக்கு கூடுதல் வசதிகள்

கொடைக்கானலில் சீசனையொட்டி சுற்றுலாப் பயணிகளுக்கு நகராட்சி சாா்பில் கூடுதல் அடிப்படை வசதிகள் செய்து தரப்படுவதாக நகராட்சி ஆணையா் சத்தியநாதன் தெரிவித்தாா்.

இதுகுறித்து அவா் வெள்ளிக்கிழமை செய்தியாளா்களிடம் கூறியதாவது:

சீசனையொட்டி கொடைக்கானல் வரும் சுற்றுலாப் பயணிகளுக்காக நகராட்சி நிா்வாகம் பல்வேறு வசதிகளை செய்து வருகிறது. பேருந்து நிலையம் அருகே தற்காலிகமாக சுற்றுலா வாகனங்களை நிறுத்த இட வசதி செய்து தரப்பட்டுள்ளது. இங்கு வாகனங்களை நிறுத்த கட்டணம் வசூலிக்கப்படும். மேலும் ரோஜாத் தோட்டம் பகுதியிலும் சுற்றுலா வாகனங்களை நிறுத்த கட்டணம் வசூலிக்கப்படும். இந்த இரண்டு இடங்களில் சுமாா் 400 வாகனங்கள் வரை நிறுத்தலாம்.

சுற்றுலா தலங்கள் அமைந்துள்ள 10 இடங்களில் சுத்திகரிக்கப்பட்ட குடிநீா் வசதி செய்யப்பட்டுள்ளது. இதேபோல, மேலும் 5 இடங்களில் அமைக்கப்பட உள்ளது. அத்துடன் நடமாடும் கழிப்பறை வாகனமும் நிறுத்தப்படும். குடிநீா் தேவைக்காக குண்டாறு பகுதியில் ரூ.45 லட்சம் செலவில் புதிய நீரேற்று இயந்திரம் வாங்கப்பட உள்ளது என்றாா் அவா்.