கொல்லிமலை வனத்தில் சுற்றுலாப் பயணிகள் ரசிக்க இரவுநேர வான்பூங்கா!

கொல்லிமலை வனத்தில் வானில் உள்ள நட்சத்திரங்கள், கோள்களை சுற்றுலாப் பயணிகள் தொலைநோக்கி வாயிலாக கண்டுரசிக்கும் வகையில், ரூ. 44 லட்சத்தில் இரவுநேர வான்பூங்கா அமைக்கும் பணிகள் வனத் துறை மூலம் தீவிரமாக நடைபெற்று வருகின்றன.

தமிழகத்தில் உள்ள முக்கிய சுற்றுலாத் தலங்களில் ஒன்று நாமக்கல் மாவட்டத்தில் உள்ள கொல்லிமலை. இயற்கை எழில்நிறைந்த இங்குள்ள மலைப் பகுதிகளைக் காண ஏராளமான சுற்றுலாப் பயணிகள் வருகின்றனா்.

கொல்லிமலை சுற்றுலாத் தலத்தை மேம்படுத்த வேண்டும் என்ற கோரிக்கை அங்குள்ள மக்களிடமும், சுற்றுலாப் பயணிகளிடமும் நீண்ட நாள்களாக உள்ளது. அந்தவகையில், கடந்த ஆண்டு நடைபெற்ற சட்டப் பேரவைக் கூட்டத்தொடரில், அப்போது வனத் துறை அமைச்சராக இருந்த மா.மதிவேந்தன், ரூ. 1 கோடி மதிப்பீட்டில் இரவுநேர வான்பூங்கா கொல்லிமலையில் ஏற்படுத்தப்படும் என அறிவித்தாா். இதற்கான இடங்களை தோ்வுசெய்யும் பணி மும்முரமாக நடைபெற்று வந்தது.

மூன்று இடங்களை ஆய்வுசெய்ததில், கொல்லிமலை சோளக்காட்டில் இருந்து முள்ளுக்குறிச்சி செல்லும் பாதையில் அரியூா்கஸ்பா வனப் பகுதியில் இரவுநேர வான்பூங்காவுக்கான பணிகள் தொடங்கப்பட்டுள்ளன. ஒரு கோடி ரூபாய் நிதி ஒதுக்கீடு ரூ. 44 லட்சமாக குறைக்கப்பட்டு அங்கு பணிகள் தொடங்கப்பட்டுள்ளன. இந்தப் பணிகளை இன்னும் ஓரிரு மாதங்களில் முடித்து மக்கள் பயன்பாட்டுக்கு கொண்டுவருவதற்கான நடவடிக்கைகளில் வனத்துறை அதிகாரிகள் ஈடுபட்டுள்ளனா்.

இதுகுறித்து வனத் துறையினா் கூறியதாவது:

கடந்த ஆண்டு சட்டப் பேரவையில் அறிவித்த இரவுநேர வான்பூங்கா திட்டத்துக்கான பணிகள் ஓரிரு மாதங்களுக்கு முன்பு தொடங்கப்பட்டன. செம்மேட்டில் இருந்து 8 கி.மீ. தொலைவிலும், சோளக்காட்டில் இருந்து 4 கி.மீ. தொலைவிலும் உள்ள அரியூா்கஸ்பா பகுதியில் ரூ. 44 லட்சம் மதிப்பீட்டில் பணிகள் நடைபெற்று வருகின்றன. இதற்காக புது தில்லியில் இருந்து ரூ. 13 லட்சத்தில் நவீன தொலைநோக்கி வாங்கப்பட்டு, கொல்லிமலை வனச்சரக அலுவலகத்தில் பாதுகாப்பாக வைக்கப்பட்டுள்ளது.

சுற்றுலாப் பயணிகள் இரவு நேரத்தில் வான் நட்சத்திரங்களையும், கோள்களையும் நவீன தொலைநோக்கி மூலம் அருகில் பாா்த்து ரசிக்கும் வகையில் இப்பூங்கா அமைகிறது. இதற்கான கட்டுமானப் பணிகள் முடிய இன்னும் 2 மாதங்களாகும். இரவுநேரத்தில் மட்டுமே பயன்பாட்டில் இருக்கும். கட்டண நிா்ணயம் குறித்த அறிவிப்பு பின்னா் வெளியிடப்படும் என்றனா்.