நீட் வினாத்தாள் கசிவு வழக்கு: சிபிஐ 5-ஆவது துணை குற்றப் பத்திரிகை தாக்கல்
அனைவருக்கும் பசுமை வணக்கம்!
‘ஆட்சி மாறினாலும் காட்சி மாறவில்லை’ என்று நெல் சாகுபடி செய்யும் விவசாயிகள் கவலையில் மூழ்குவது வாடிக்கையாகவே உள்ளது.
மத்திய அரசின் பரவலாக்கப்பட்ட நெல் கொள்முதல் திட்டத்தின் கீழ், தமிழ்நாடு அரசின் நுகர்பொருள் வாணிபக் கழகம், விவசாயிகளிடமிருந்து நெல் கொள்முதல் செய்கிறது. இந்த நெல், அரிசியாக மாற்றப்பட்டு ரேஷன் கடைகள் மூலம் மக்களுக்கு வழங்கப்படுகிறது.
தமிழ்நாட்டில் நேரடி கொள்முதல் நிலையங்களில் போதிய இடவசதி இல்லை. இதனால், திறந்தவெளியில் நெல் மூட்டைகள் வைக்கப்படுகின்றன. அவை முறையாகப் பாதுகாக்கப்படாததால், மழையில் நனைந்து பாழாவது, அரை நூற்றாண்டுக்கும் மேலாகத் தொடர்கிறது இந்த அவலம். கடந்த மே மாதத்தில் பெய்த கோடை மழையின்போதுகூட, பல மாவட்டங்களில் நெல் மூட்டைகள் வீணாகின. இதோ... இந்த போகத்துக்கான அறுவடை ஆரம்பித்துவிட்டது- மழையும்தான்.
‘‘கடந்த மூன்று ஆண்டு காலமாக, நெல் மற்றும் இதர தானியங்கள் மழையில் நனைவது குறித்து பல அறிக்கைகள் வெளியிட்டும், இந்தத் தி.மு.க ஆட்சியில் தீர்வு கிடைக்கவில்லை’’ என்று முன்னாள் முதல்வர் ஓ.பன்னீர்செல்வம், கடந்த மே மாதத்தில் அறிக்கையை வெளியிட்டார்.
‘‘நேரடி கொள்முதல் நிலையங்களில் நெல் கொள்முதல் செய்யாமல் தவிர்க்கின்றனர். இதனால், திறந்தவெளியில் கிடக்கும் விவசாயிகளின் நெல் மூட்டைகள் மழையில் நனைந்து சேதமடைகின்றன. உரிய கிடங்குகள் இல்லை. இந்த அ.தி.மு.க ஆட்சியில் விவசாயிகளின் நிலை மிகவும் கவலைக்கிடமாக உள்ளது’’ என்று 2018-ம் ஆண்டு அக்டோபர் மாதத்தில் குற்றச்சாட்டுகளை முன்வைத்தார், மன்னார்குடி சட்டமன்றத் தொகுதியின் அன்றைய தி.மு.க உறுப்பினரும், இன்றைய தொழில்துறை அமைச்சருமான டி.ஆர்.பி.ராஜா.
ஆக, ஆட்சிகள் மாறும்போதெல்லாம் லாவணி பாடும் ஆள் மாறிக்கொண்டே இருக்கிறார்கள்... காட்சிகள் மட்டும் அப்படியே தொடர்கின்றன.
‘நான்தான் விவசாயி’ என்று பச்சைத் தலைப்பாகைக் கட்டிக்கொண்டு முதல்வராக வலம் வந்தார் நேற்றைய முதல்வர் எடப்பாடி பழனிசாமி. ‘நானும் டெல்டாகாரன்தான்’ என்று பச்சைத் துண்டோடு வலம் வருகிறார், இன்றைய முதல்வர் மு.க.ஸ்டாலின்.
தலைப்பாகைக் கட்டிக்கொள்வது, மாட்டுவண்டியில் பயணிப்பது, கதிர்முற்றி நிற்கும் வயலில் விவசாயிகளின் தோளில் கைபோட்டு போஸ் கொடுப்பது, பச்சைத் துண்டு போடுவது என இந்தக் கோமாளிக் கூத்துகளால், விவசாயிகளுக்கும் சரி... நாட்டுக்கும் சரி... ஒரு நெல்முனையளவுகூட நன்மை கிடைக்கப்போவதில்லை. இவற்றையெல்லாம் விட்டொழித்துவிட்டு, ஆக்கபூர்வமான பணிகளில் கவனத்தைத் திருப்புவதுதான், ஆட்சியாளர்களின் செயல்பாடுகளாக இருக்க வேண்டும்.
இப்போதைய வாய்ப்பு... முதல்வர் ஸ்டாலின் கையில். கவனத்தைத் திருப்புவார் என்று நம்புவோம்!
- ஆசிரியர்
