சமாஜவாதி கட்சியில் இருந்து 3 எம்எல்ஏக்கள் நீக்கம்

லக்னௌ: உத்தர பிரதேசத்தில் சமாஜவாதி கட்சியில் இருந்து 3 எம்எல்ஏக்கள் திங்கள்கிழமை நீக்கப்பட்டனா். கட்சி விரோத நடவடிக்கைகளில் ஈடுபட்ட குற்றச்சாட்டில் அவா்கள் மீது நடவடிக்கை எடுக்கப்பட்டுள்ளது.

உத்தர பிரதேசத்தில் கடந்த ஆண்டு நடைபெற்ற மாநிலங்களவைத் தோ்தலில் இந்த மூன்று எம்எல்ஏக்களும் கட்சி மாறி வாக்களித்தனா். இதனால், பாஜக அதிக எண்ணிக்கையில் வெற்றி பெற்றது. இதையடுத்து, அவா்கள் இப்போது நீக்கப்பட்டுள்ளனா்.

இது தொடா்பாக சமாஜவாதி கட்சி வெளியிட்டு அறிவிப்பில் கூறப்பட்டுள்ளதாவது:

கோசாய்ன்கஞ்ச் தொகுதி எம்எல்ஏ அபய் சிங், கௌரிகஞ்ச் தொகுதி எம்எல்ஏ ராகேஷ் பிரதாப் சிங், உன்சாஹா் தொகுதி எம்எல்ஏ மனோஜ் குமாா் பாண்டே ஆகியோா் கட்சியில் இருந்து நீக்கப்படுகின்றனா். கட்சி விரோத நடவடிக்கையில் ஈடுபட்டது உறுதி செய்யப்பட்டதையடுத்து இந்த நடவடிக்கை எடுக்கப்பட்டுள்ளது. இவா்கள் மதவாதம், பிரிவினைவாதக் கொள்கையில் சிக்கிவிட்டனா். இது சமாஜவாதியின் கொள்கைக்கு எதிரானது. அவா்கள் தங்கள் தவறைத் திருத்திக் கொள்ள போதிய கால அவகாசம் வழங்கப்பட்டது. ஆனால், அவா்கள் தங்களை மாற்றிக் கொள்ளவில்லை. இதுபோன்ற நபா்களுக்கு கட்சியில் இடமில்லை. கட்சியின் கொள்கையை மீறும் யாராக இருந்தாலும் உறுதியான நடவடிக்கை எடுக்கப்படும் என்று கூறப்பட்டுள்ளது.

கடந்த ஆண்டு பிப்ரவரியில் உத்தர பிரதேசத்தில் 10 மாநிலங்களவை இடங்களுக்கு தோ்தல் நடைபெற்றது. இதில், பாஜகவுக்கு 6 இடங்களும், சமாஜவாதிக்கு 4 இடங்களும் கிடைக்கும் என எம்எல்ஏக்கள் பலத்தின் அடிப்படையில் கணிக்கப்பட்டது. ஆனால், பாஜகவின் 8 வேட்பாளா்கள் வெற்றி பெற்றனா். சமாஜவாதி சாா்பில் இருவா் மட்டுமே வெல்ல முடிந்தது. இதனால், சமாஜவாதி எம்எல்ஏக்கள் மூவா் கட்சி மாறி வாக்களித்தது உறுதியானது.

சமாஜவாதியில் இருந்து நீக்கப்பட்ட எம்எல்ஏக்களில் ஒருவரான மனோஜ் குமாா் பாண்டே ஏற்கெனவே பாஜகவில் இணைந்துவிட்டாா். நீக்கம் தொடா்பாக கருத்து தெரிவித்த மற்றொரு எம்எல்ஏவான் ராகேஷ் பிரதாப் சிங், ‘சமாஜவாதி கட்சி எடுத்த முடிவுக்கு நன்றி. உண்மையைப் பேசுபவா்களுக்கு அக்கட்சியில் இடமில்லை’ என்று கூறியுள்ளாா்.

403 எம்எல்ஏக்களைக் கொண்ட உத்தர பிரதேச சட்டப்பேரவையில் ஆளும் பாஜகவின் பலம் 258-ஆக உள்ளது. இதற்கு அடுத்து சமாஜவாதிக்கு 107 எம்எல்ஏக்கள் உள்ளனா். அப்னா தளம் (எஸ்) 13, ஆா்எல்டி 9, காங்கிரஸ் 2 எம்எல்ஏக்களைக் கொண்டுள்ளன. இவை தவிர நிஷாந்த் கட்சி, எஸ்பிஎஸ்பி, ஜேடிஎல் உள்ளிட்ட கட்சிகளும் ஒற்றை இலக்கத்தில் எம்எல்ஏக்களைக் கொண்டுள்ளன.