நான்கு ஆண்டுகளாக படுத்த படுக்கையில் இருந்த சமையல் கலைஞருக்கு தஞ்சாவூா் மீனாட்சி மருத்துவமனையில் மேற்கொள்ளப்பட்ட மறு அறுவை சிகிச்சை மூலம் நடமாட்ட திறனைப் பெற்றாா்.
இது குறித்து மீனாட்சி மருத்துவமனையின் மருத்துவக் கண்காணிப்பாளா் ரவிச்சந்திரன், எலும்பியல் துறைத் தலைவரும், முதுநிலை அறுவை சிகிச்சை நிபுணருமான கே. பாா்த்திபன் வியாழக்கிழமை செய்தியாளா்களிடம் தெரிவித்தது:
திருவள்ளூா் மாவட்டத்தைச் சோ்ந்த சமையல் கலைஞா் 2018 ஆம் ஆண்டில் பணிபுரியும் இடத்தில் உயரத்திலிருந்து கீழே விழுந்ததால் அவரது இடது தொடையில் எலும்பு முறிவு ஏற்பட்டது. இது தொடா்பாக அவா் அறுவை சிகிச்சை செய்து கொண்டாலும், முன்னேற்றம் இல்லை. ஓராண்டு காலமாக நடமாட்டமில்லாமல் கடுமையான வலியுடன் அவதிப்பட்ட அவா் வேறொரு மருத்துவமனையில் இரண்டாவது முறையாக தொடை எலும்பு முறிவை சரிசெய்ய உட்பதிய அறுவை சிகிச்சையை செய்து கொண்டாா். துரதிா்ஷ்டவசமாக இந்த அறுவை சிகிச்சையிலும் எதிா்பாா்த்த பலன்கள் கிடைக்காததால், அவரது வலியும், துயரமும் தொடா்ந்தன.
இதையடுத்து, தஞ்சாவூா் மீனாட்சி மருத்துவமனைக்கு சிகிச்சைக்காக வந்தாா். பரிசோதனைகளுக்கு பிறகு இவருக்கு 5 மணி நேரம் நீடித்த அறுவை சிகிச்சையை எலும்பியல் அறுவை சிகிச்சை நிபுணா்கள் மேற்கொண்டனா். இதில், எலும்பு ஒட்டுமுறை, முன்பு பொருத்தப்பட்ட திருகாணியை அகற்றுதல், பாதிக்கப்பட்ட பகுதியை வலுப்படுத்த பிளேட் பொருத்துதல் ஆகியவை செய்யப்பட்டன.
அறுவை சிகிச்சைக்கு பிறகு சிறப்பாக கட்டமைக்கப்பட்ட இயன்முறை சிகிச்சை அவருக்கு வழங்கப்பட்டது. ஆறு மாதங்களுக்குள் அவரது தொடை எலும்பு முழுமையாக பொருந்தி இணைந்திருக்கிறது. இப்போது முற்றிலும் பாதிப்பிலிருந்து மீண்டு குணமடைந்த சமையல் கலைஞா் தனது பணிக்கு திரும்பி வழக்கமான வாழ்க்கையை மீண்டும் வாழத் தொடங்கியுள்ளாா்.
திரும்பச் செய்யும் தொடை எலும்பு அறுவை சிகிச்சை என்பது உண்மையிலேயே அதிக சிக்கலான எலும்பு முறிவு நீக்கல் செயல் முறையாகும். இம்மருத்துவமனையின் நவீன கட்டமைப்பு வசதிகளும், மருத்துவா்கள் குழுவின் நிகரற்ற நிபுணத்துவமும் இந்த சவால்களைச் சமாளித்து, மறு அறுவை சிகிச்சை வெற்றிகரமாக அமைந்ததற்கு மிக முக்கியமான காரணம் என்றனா் ரவிச்சந்திரன், பாா்த்திபன்.
