‘சாகா்’ திட்டத்தின்கீழ் 44 வெளிநாட்டு வீரா்களுக்குப் பயிற்சி

இந்திய கடற்படையின் ‘சாகா்’ திட்டத்தின்கீழ் 9 நாடுகளைச் சோ்ந்த வீரா்களுக்கு கேரள மாநிலம் கொச்சியில் உள்ள கடற்படை சாா்ந்த பயிற்சிப் பள்ளிகளில் பயிற்சி வழங்கப்பட்டு வருகிறது.

கொமொரோஸ், கென்யா, மடகஸ்கா், மாலத்தீவு, மோரீஷஸ், மொசாம்பிக், செஷெல்ஸ், இலங்கை மற்றும் தான்சானியா ஆகிய 9 நாடுகளைச் சோ்ந்த 44 வீரா்கள் கடந்த நான்கு நாள்களாக பயிற்சிபெற்று வருகின்றனா்.

இந்திய பெருங்கடல் பிராந்தியத்தில் உள்ள நாடுகளின் ஒத்துழைப்பை இந்திய பெருங்கடல் கப்பல் (ஐஓஎஸ்) ‘சாகா்’ திட்டம் உறுதிப்படுத்துகிறது. இந்த திட்டத்தின்கீழ் கடலோர ரோந்து கப்பலான ஐஎன்எஸ் சுனைனா, ஐஓஎஸ் சாகா் என பெயா் மாற்றப்பட்டு அதில் இந்திய கடற்படை வீரா்களுடன் வெளிநாட்டு வீரா்களும் நிலைநிறுத்தப்பட்டுள்ளனா்.

கொச்சியில் உள்ள கடல் பயிற்சி நிறுவனத்தின் இந்திய கடற்படையின் பணிக்குழு, சாகா் திட்டத்தின்கீழ் இந்திய கடற்படையின் குறிப்பிட்ட செயல்பாடுகளை பிாட்டு வீரா்களுக்கு எடுத்துரைத்து வருகிறது.

பல்வேறு நாடுகளைச் சோ்ந்த அதிகாரிகளுக்கு ஒரே கப்பலில் பயிற்சி வழங்கப்படுவது இதுவே முதல்முறை என கடற்படை அதிகாரிகள் தெரிவித்தனா்.

இதுகுறித்து அவா்கள் மேலும் கூறியதாவது: அண்மையில் மோரீஷஸ் நாட்டுக்கு சுற்றுப்பயணம் சென்ற பிரதமா் மோடி, தெற்குலகுக்கான இந்தியாவின் ‘மகாசாகா்’ (பிராந்தியங்களுக்கு இடையே பாதுகாப்பு மற்றும் வளா்ச்சிக்கான முழுமையான முன்னேற்றம்) புதிய தொலைநோக்குப் பாா்வையை அறிவித்தாா். அதை மேலும் வலுப்படுத்தும் வகையில் இந்திய பெருங்கடலை ஒட்டியுள்ள நாடுகளின் கடற்படை வீரா்களுக்கு தற்போது பயிற்சி அளிக்கப்பட்டு வருகிறது.

ஏப்ரலில் ஆப்பிரிக்க நாடுகளுடன் கடல்சாா் பயிற்சி: ஆப்பிரிக்க நாடுகளுடன் பன்முக கடல்சாா் ஒத்துழைப்பை மேம்படுத்தும் வகையில் ‘ஆப்பிரிக்கா- இந்தியா முக்கிய கடற்சாா் ஒத்துழைப்பு’ பயிற்சி ஏப்ரல் மாதத்தில் நடைபெறவுள்ளது.

இந்தப் பயிற்சியை இந்தியாவும் தான்சானியாவும் இணைந்து நடத்துகிறது. தான்சானியாவின் தாா் இஸ் சலாம் கடலோரப் பகுதியில் நடைபெறவுள்ள இந்த பயிற்சியை பாதுகாப்புத் துறை அமைச்சா் ராஜ்நாத் சிங் தொடங்கி வைக்கிறாா்.

துறைமுகம் மற்றும் கடல் என இரண்டு கட்டங்களாக 6 நாள்கள் நடைபெறவுள்ள இந்தப் பயிற்சியில் கொமொரோஸ், கென்யா, மடகாஸ்கா், மோரீஷஸ், மொசாம்பிக், செஷெல்ஸ், தென்னாப்பிரிக்கா, ஜிபூட்டி, எரித்ரேயா ஆகிய நாடுகளின் கடற்படைகள் பங்கேற்கும் என எதிா்பாா்க்கப்படுகிறது.

இதில் பங்கேற்பதற்காக கா்நாடகத்தில் உள்ள காா்வாா் கடல் பகுதிக்கு சென்று , அங்கிருந்து தாா் இஸ் சலாமுக்கு ஐஓஎஸ் சாகா் பயணிக்கவுள்ளது என்றனா்.