சாலை விபத்தில் கல்லூரி மாணவா் உயிரிழப்பு

மயிலாடுதுறை அருகே திங்கள்கிழமை இரவு நேரிட்ட சாலை விபத்தில் கல்லூரி மாணவா் உயிரிழந்தாா்.

மயிலாடுதுறை மாவட்டம், குத்தாலம் வட்டம் எலந்தங்குடியைச் சோ்ந்த கல்லூரி மாணவா்கள் முகமதுசாஜித்(19), முகமது ரியாம் (19). இவா்கள் இருவரும் இருசக்கர வாகனத்தில் காரைக்கால் மாவட்டம் நல்லாத்தூா் சென்றுவிட்டு மதுபோதையில் ஊா் திரும்பியதாக கூறப்படுகிறது. மாவட்ட எல்லையான நல்லாடை காவல் சோதனை சாவடி அருகே உள்ள திருப்பத்தில் விபத்து ஏற்பட்டது. இதில், இருவரும் படுகாயம் அடைந்த நிலையில் மீட்கப்பட்டு ஆம்புலன்ஸ் மூலம் மயிலாடுதுறை அரசினா் மருத்துவமனைக்கு கொண்டு செல்லப்பட்டனா்.

ஆம்புலன்ஸில் முகமது ரியாம் ஸ்ட்ரெக்சரிலும், முகமது சாஜித் அமா்ந்தும் வந்துள்ளனா். மயிலாடுதுறை அரசினா் மருத்துவமனை உள்ளே வந்த ஆம்புலன்ஸ், புறநோயாளிகள் சிகிச்சை பிரிவு பகுதிக்கு திரும்பியபோது ஆம்புலன்ஸில் இருந்த முகமது சாஜித் எதிா்பாராதவிதமாக கீழே சாய்ந்ததில், முகமது ரியாம் படுக்க வைக்கப்பட்டிருந்த ஸ்ட்ரெக்சா் அடியில் தலை சிக்கிக் கொண்டது. தலையை வெளியில் எடுக்க முடியாமல் முகமது சாஜித் கதறியுள்ளாா்.

மருத்துவமனை ஊழியா்கள் மற்றும் பொதுமக்கள் மீட்க முயற்சித்தும் பலனளிக்காதாதால் மயிலாடுதுறை தீயணைப்பு துறையினரை வரவழைக்கப்பட்டு ஸ்ட்ரக்சரை கட் செய்து முகமது சாஜித் மீட்கப்பட்டாா். பின்னா் இருவரும் அவசர சிகிச்சைப் பிரிவில் அனுமதிக்கப்பட்டனா். இதற்கிடையே, முகமது ரியாம் மேல்சிகிச்சைக்காக திருவாரூா் கொண்டு செல்லப்பட்டு அங்கு சிகிச்சை பலனின்றி உயிரிழந்தாா். தொடா்ந்து, அவரது உடலை மயிலாடுதுறை அரசினா் மருத்துவமனைக்கு அனுப்பி வைத்த பெரம்பூா் போலீஸாா் வழக்குப் பதிவு செய்து விசாரணை மேற்கொண்டுள்ளா்.