சாலையில் சுற்றித்திரியும் கால்நடைகளின் உரிமையாளா்களுக்கு ரூ.10 ஆயிரம் வரை அபராதம் விதிக்கப்படும்: ஆணையா் எச்சரிக்கை

தூத்துக்குடி மாநகராட்சிப் பகுதி சாலைகளில் சுற்றித்திரியும் கால்நடைகளின் உரிமையாளா்களுக்கு ரூ.10 ஆயிரம் வரை அபராதம் விதிக்கப்படும் என மாநகராட்சி ஆணையா் லி.மதுபாலன் எச்சரிக்கை விடுத்துள்ளாா்.

இது குறித்து அவா் வெளியிட்டுள்ள செய்திக்குறிப்பு: தூத்துக்குடி மாநகராட்சிப் பகுதி சாலைகளில் பொதுமக்களுக்கும் போக்குவரத்திற்கும் அச்சுறுத்தலை ஏற்படுத்தும் விதமாக அலைந்து திரியும் கால்நடைகளை வளா்ப்போா், தங்களுக்கு சொந்தமான இடங்களில் கொட்டில் அமைத்து பராமரிக்குமாறு பல்வேறு அறிவிப்புகள் மாநகராட்சி சாா்பில் வெளியிடப்பட்டன. இருப்பினும் பலா் தங்கள் மாடுகளை முறையாக பராமரிக்காமல் சாலையில் சுற்றித்திரிய விட்டுள்ளனா்.

இதே நிலை தொடா்ந்தால், ஒரு மாட்டுக்கு ரூ.10 ஆயிரம் வரை அபராதம் விதிப்பதோடு, கால்நடையின் உரிமையாளா்கள் மீது சட்ட ரீதியான நடவடிக்கையும் எடுக்கப்படும் என அவா் எச்சரிக்கை விடுத்துள்ளாா்.