சின்னா், ஜோகோவிச் வெற்றி

விம்பிள்டன் டென்னிஸ் போட்டியில் முன்னணி வீரா்களான இத்தாலியின் யானிக் சின்னா், சொ்பியாவின் நோவக் ஜோகோவிச் ஆகியோா் ரவுண்ட் ஆஃப் 16-இல் வென்று காலிறுதிக்கு தகுதிபெற்றனா்.

ஆடவா் ஒற்றையா் காலிறுதிக்கு முந்தைய சுற்றில், உலகின் நம்பா் 1 வீரரான சின்னா் - போட்டித்தரவரிசையில் 19-ஆம் இடத்திலிருந்த பல்கேரியாவின் கிரிகோா் டிமிட்ரோவை எதிா்கொண்டாா். முதல் கேமின்போது நிலை தடுமாறி விழுந்ததில் சின்னருக்கு முழங்கையில் அடிபட்டது. இதனால் அவா் தனது முதல்தர ஆட்டத்தை வெளிப்படுத்த முடியாமல் சிரமப்பட்டாா்.

எனவே, டிமிட்ரோவ் முதலிரு செட்களை 6-3, 7-5 என கைப்பற்றி முன்னிலை வகித்தாா். ஆனால், 3-ஆவது செட்டில் இருவரும் 2-2 என சமநிலையில் இருந்தபோது, டிமிட்ரோவுக்கு வலதுபக்க மாா்புக் கூடு பகுதியில் வலி ஏற்பட்டது. அவரால் தொடா்ந்து விளையாட முடியாமல் போக, போட்டியிலிருந்து விலகுவதாக டிமிட்ரோவ் கண்ணீருடன் அறிவித்தாா்.

இத்துடன் டிமிட்ரோவ், கிராண்ட்ஸ்லாம் போட்டிகளில் அவா் களம் கண்ட 5 முறையுமே காயம் காரணமாக விலகி ஏமாற்றத்தை சந்தித்துள்ளாா். கடந்த ஆண்டு விம்பிள்டன், யுஎஸ் ஓபன், இந்த ஆண்டு ஆஸ்திரேலிய ஓபன், பிரெஞ்சு ஓபன் ஆகியவற்றிலும் அவா் காயம் காரணமாக விலகியது குறிப்பிடத்தக்கது.

மறுபுறம் சின்னா், தொடா்ந்து 4-ஆவது முறையாக விம்பிள்டனில் காலிறுதிச்சுற்றுக்கு முன்னேறியிருக்கிறாா். அதில் அவா், முதல் முறையாக விம்பிள்டன் காலிறுதிக்கு வந்திருக்கும் அமெரிக்காவின் பென் ஷெல்டனுடன் மோதுகிறாா்.

இருவரும் இதுவரை 6 முறை மோதியிருக்க, சின்னா் 5 வெற்றிகளுடன் ஆதிக்கம் செலுத்துகிறாா். முன்னதாக, போட்டித்தரவரிசையில் 10-ஆம் இடத்திலிருக்கும் ஷெல்டன் 3-6, 6-1, 7-6 (7/1), 7-5 என்ற வகையில், இத்தாலியின் லொரென்ஸோ சொனிகோவை வெளியேற்றி காலிறுதிக்கு முன்னேறியுள்ளாா்.

இதனிடையே மற்றொரு ரவுண்ட் ஆஃப் 16 ஆட்டத்தில், 24 முறை கிராண்ட்ஸ்லாம் சாம்பியனான ஜோகோவிச் 1-6, 6-4, 6-4, 6-4 என்ற செட்களில், போட்டித்தரவரிசையில் 11-ஆம் இடத்திலிருந்த ஆஸ்திரேலியாவின் அலெக்ஸ் டி மினாரை தோற்கடித்தாா்.

இந்த வெற்றியின் மூலமாக, 16-ஆவது முறையாக விம்பிள்டன் காலிறுதிக்கு முன்னேறியிருக்கும் ஜோகோவிச், 8-ஆவது முறையாக இப்போட்டியில் சாம்பியனாகி சாதனை படைக்கும் முனைப்புடன் இருக்கிறாா். அந்தக் காலிறுதி ஆட்டத்தில் அவா் இத்தாலியின் ஃபிளாவியோ கோபோலியை எதிா்கொள்கிறாா்.

முன்னதாக, போட்டித்தரவரிசையில் 22-ஆம் இடத்திலிருக்கும் கோபோலி 6-4, 6-4, 6-7 (4/7), 7-6 (7/3) என்ற செட்களில், குரோஷியாவின் மரின் சிலிச்சை சாய்த்து, முதல் முறையாக விம்பிள்டன் காலிறுதிக்கு முன்னேறியிருக்கிறாா்.

காலிறுதியில் ஆண்ட்ரீவா, ஸ்வியாடெக்

விம்பிள்டன் மகளிா் ஒற்றையா் ரவுண்ட் ஆஃப் 16-இல், போட்டித்தரவரிசையில் 7-ஆம் இடத்திலிருக்கும் ரஷியாவின் இளம் வீராங்கனை மிரா ஆண்ட்ரீவா 6-2, 6-3 என்ற நோ் செட்களில், 10-ஆம் இடத்திலிருந்த அமெரிக்காவின் எம்மா நவாரோவை வெளியேற்றினாா்.

தற்போது காலிறுதிக்கு வந்த அவா், கடந்த 18 ஆண்டுகளில் விம்பிள்டனில் காலிறுதிக்கு முன்னேறிய இளம் வீராங்கனை என்ற பெருமையைப் பெற்றுள்ளாா். அந்தக் காலிறுதியில் ஆண்ட்ரீவா, முதல்முறையாக விம்பிள்டன் காலிறுதிக்கு வந்திருக்கும் சுவிட்ஸா்லாந்தின் பெலிண்டா பென்சிச்சுடன் மோதுகிறாா்.

இதனிடையே மற்றொரு ஆட்டத்தில், உலகின் 8-ஆம் நிலையில் இருக்கும் 5 முறை கிராண்ட்ஸ்லாம் சாம்பியனான போலந்தின் இகா ஸ்வியாடெக், 6-4, 6-1 என்ற செட்களில் எளிதாக, போட்டித்தரவரிசையில் 23-ஆம் இடத்திலிருந்த டென்மாா்க்கின் கிளாரா டௌசனை வீழ்த்தி, 2-ஆவது முறையாக விம்பிள்டன் காலிறுதிக்கு வந்துள்ளாா்.

அதில் அவா், ரஷியாவின் லுட்மிலா சாம்சோனோவாவுடன் மோதுகிறாா். போட்டித்தரவரிசையில் 19-ஆம் இடத்திலிருக்கும் சாம்சோனோவா 7-5, 7-5 என, ஸ்பெயினின் ஜெஸ்ஸிகா புஸாஸை வீழ்த்தி, காலிறுதிக்கு முன்னேறியிருக்கிறாா். போட்டித்தரவரிசையில் 13-ஆம் இடத்திலிருக்கும் அமெரிக்காவின் அமாண்டா அனிசிமோவா 6-2, 5-7, 6-4 என்ற செட்களில், 30-ஆம் இடத்திலிருந்த செக் குடியரசின் லிண்டா நோஸ்கோவாவை வீழ்த்தி காலிறுதிக்கு முன்னேறினாா்.

மாடத்தில் மிளிா்ந்த நட்சத்திரங்கள்...

டென்னிஸின் ‘பிக் த்ரீ’ என்று அழைக்கப்பட்ட வீரா்களில் ஒருவரான சுவிட்ஸா்லாந்தின் ரோஜா் ஃபெடரா், ஜோகோவிச் விளையாடிய ஆட்டத்தை பாா்வையாளா் மாடத்தில் அமா்ந்து நேரில் கண்டு ரசித்தாா். டென்னிஸிலிருந்து ஃபெடரா் ஓய்வு பெற்றிருந்தாலும், விம்பிள்டனில் அதிக முறை (8) சாம்பியனானவா், அதிக வெற்றிகளை (105) பதிவு செய்தவா் என்ற சாதனைகள் அவா் வசம் உள்ளன. தற்போது 7 முறை சாம்பியனாக இருக்கும் ஜோகோவிச், அவரின் சாதனையை சமன் செய்யும் முனைப்புடன் உள்ளாா்.

இதனிடையே, ஜோகோவிச் ஆட்டத்தை நேரில் காண பாா்வையாளா் மாடத்தில் திரண்ட பல்துறை நட்சத்திரங்களில், இந்தியாவின் விராட் கோலி, அவரின் மனைவி அனுஷ்கா சா்மா, கால்பந்து நட்சத்திரம் டேவிட் பெக்காம், ஹாலிவுட் திரை நட்சத்திரங்கள் டாம் ஹேங்க்ஸ், ரஸ்ஸெல் குரோ, இங்கிலாந்து கிரிக்கெட்டா்கள் ஜோ ரூட், ஜேம்ஸ் ஆண்டா்சன் உள்ளிட்டோரும் அடங்குவா்.

ஃபெடரா்,