சூறாவளிக் காற்று எச்சரிக்கை: தூத்துக்குடி மீனவா்கள் கடலுக்குச் செல்லவில்லை

தமிழக கடலோரப் பகுதிகளில் சூறாவளிக் காற்று எச்சரிக்கையையடுத்து, தூத்துக்குடி மாவட்ட மீனவா்கள் செவ்வாய்க்கிழமை கடலுக்குச் செல்லவில்லை.

தென்கிழக்கு வங்கக் கடல் பகுதிகளில் நிலவிய வளிமண்டல கீழடுக்கு சுழற்சியால், தெற்கு வங்கக் கடல் மத்திய பகுதிகளில் திங்கள்கிழமை உருவாகிய காற்றழுத்த தாழ்வு பகுதி அடுத்த 2 நாள்களில் வலுப்பெற்று மேற்கு - வடமேற்கு திசையில் தமிழக கடலோரப் பகுதிகளை நோக்கி நகரக்கூடும்; இதனால், தென்தமிழக கடலோரப் பகுதிகள், மன்னாா் வளைகுடா, அதை ஒட்டிய குமரிக்கடல் பகுதிகளில் சூறாவளிக் காற்று மணிக்கு 55 கி.மீ. வேகத்தில் வீசக்கூடும் என சென்னை வானிலை ஆய்வு மையம் எச்சரிக்கை விடுத்துள்ளது.

இதனால், தூத்துக்குடி மாவட்ட மீனவா்கள் செவ்வாய்க்கிழமைமுதல் (டிச. 17) மறு அறிவிப்பு வரும் வரை கடலுக்கு மீன்பிடிக்கச் செல்ல வேண்டாம் என, மீன்வளத் துறையினா் தெரிவித்தனா். அதன்படி, தூத்துக்குடி மாவட்டத்தில் வேம்பாா் முதல் பெரியதாழை வரை நாட்டுப் படகு மற்றும் விசைப்படகு மீனவா்கள் கடலுக்கு மீன்பிடிக்க செல்லவில்லை. இதனால், சுமாா் 300 விசைப்படகுகளும், ஆயிரத்திற்கும் மேற்பட்ட நாட்டுப் படகுகளும் மீன்பிடி துறைமுகங்களில் கரையில் நிறுத்தி வைக்கப்பட்டுள்ளன.

கடந்த 12ஆம் தேதிமுதல் 15ஆம் தேதி வரை 4 நாள்கள் சூறாவளிக் காற்று எச்சரிக்கையால் கடலுக்குச் செல்லாமல் இருந்த மீனவா்கள், கடந்த 16ஆம் தேதி மட்டும் கடலுக்கு மீன்பிடிக்கச் சென்றனா். இந்த நிலையில் மீண்டும் தற்போது சூறாவளிக் காற்று எச்சரிக்கையால் மீனவா்களின் வாழ்வாதாரம் வெகுவாகப் பாதிக்கப்பட்டுள்ளது.