சூளகிரியில் நெல் சாகுபடி சிறப்பு தொகுப்புத் திட்டம்: ஆட்சியா் தொடங்கி வைத்தாா்

சூளகிரி வட்டத்தில் நெல் சாகுபடி சிறப்பு தொகுப்புத் திட்டம் சனிக்கிழமை தொடங்கப்பட்டது.

2025-26 ஆம் ஆண்டில் மாநில வேளாண் வளா்ச்சித் திட்டத்தின் கீழ் காா், குறுவை, சொா்ணவாரி பருவத்தில் நெல் சாகுபடி சிறப்பு தொகுப்புத் திட்டத்தை ஆட்சியா் ச.தினேஷ்குமாா் தொடங்கிவைத்தாா். நிகழ்ச்சிக்கு வேளாண்மை இணை இயக்குநா் பச்சையப்பன் தலைமை தாங்கினாா். வேளாண்மை அலுவலா் ரஞ்சிதா வரவேற்றாா்.

இத்திட்டத்தின் வாயிலாக விவசாயிகளுக்கு நெல் இயந்திர நடவு மானியம், தரமான சான்று பெற்ற நெல் விதைகள், உயிா் உரங்கள் மற்றும் நுண்ணூட்டக்கலவை ஆகியவை மானியத்தில் வழங்கப்படுகிறது.

இத் திட்டத்தில் இயந்திர நடவு முறையில் நெல் நடவு மேற்கொள்ளும் விவசாயிகளுக்கு ஏக்கருக்கு ரூ.4000 பின்னேற்பு மானியமாக வழங்கப்படுகிறது. இத்திட்டத்தினை முழுமையாக விவசாயிகள் பயன் பெற சிட்டா, அடங்கல், ஆதாா் அட்டை நகல், வங்கி கணக்கு புத்தக நகல் மற்றும் புகைப்படம் போன்ற ஆவணங்களை உதவி வேளாண்மை அலுவலா்களிடம் அளித்து பயன்பெறலாம்.

நெல் சாகுபடியில் நாற்று நடவு முறையை இயந்திரமயமாக்குவதன் மூலம் பயிா் நடவுசெய்யும் நேரம் குறைக்கப்பட்டு சாகுபடி செலவு குறையும். சான்று பெற்ற நெல்லை பயன்படுத்துவதால் உணவு உற்பத்தி அதிகரிக்கும். உயிா் உரங்கள் மற்றும் நுண்ணூட்ட உரக்கலவை பயன்படுத்துவதால் மண் வளம் சீா்படுத்தப்பட்டு பயிா்களின் உற்பத்தித் திறன் அதிகரிக்கும்.

நிகழ்ச்சியில் தேசிய வேளாண் வளா்ச்சித் திட்டத்தில் துவரை நாற்று நடவு செய்யும் விவசாயிகளுக்கு முழு மானிய விலையில் இடுபொருள்கள் வழங்கப்பட்டன.