சேலம் : `ஒன்றா இரண்டா... எத்தனை மோசடிகள்?’ - அதிர வைக்கும் போலி பெண் ஐ.பி.எஸ் அதிகாரி கைது

சேலம் மாவட்டம், அம்மாபேட்டை பகுதியில் ஆத்தூர் செல்லும் மெயின் ரோட்டில் அமைந்துள்ளது சிவகாமி திருமண மண்டபம். இதில், கடந்த 8 மாதமாக புனித அன்னை தெரசா மனிதநேய அறக்கட்டளை எனும் நிறுவனம் வாடகைக்கு இயங்கி வந்தது. இந்த நிறுவனத்தின் உரிமையாளர் வேலூரைச் சேர்ந்த விஜயபானு எனும் பெண் இருந்து வந்துள்ளார். ஏழை எளிய மக்களுக்கு உணவு வழங்கி உதவி செய்வது போன்ற தோற்றத்தை ஒருபக்கம் ஏற்படுத்தி, மறு பக்கம் மக்களை ஏமாற்றி, பண இரட்டிப்பு செய்து தருவதாக கூறி மோசடி செய்து வந்தது தெரியவந்து போலீஸாரால் கைது செய்யப்பட்டுள்ளார்.

மேலும் இவர் நடத்திவந்த நிறுவனத்தின் அலுவலகத்தில் இருந்து 12 கோடி ரூபாய் பணமும், 2.5 கிலோ தங்கமும் கைப்பற்றப்பட்டதுடன், இவருடன் சேர்ந்து பணமோசடியில் ஈடுபட்ட ஜெய பிரதா, பாஸ்கர், சையத் மஹ்மூத் ஆகியோரும் கைது செய்யப்பட்டு சிறையில் இருந்து வருகின்றனர்.

யார் இந்த விஜயபானு?

இந்நிலையில் மோசடி வழக்கில் சிக்கியுள்ள விஜயபானு மீது மேலும் சில புகார்கள் சேலம் பொருளாதார குற்றப்பிரிவில் குவியத்தொடங்கியுள்ளன.

முதலில் தன்னை ஒரு பாஜக நிர்வாகி என்று அடையாளப்படுத்திக்கொண்ட விஜயபானு, வேலூர் மாவட்ட பட்டியல் அணி தலைவராக இருந்துக்கொண்டு, 2021 ஆம் ஆண்டு நடந்த நகராட்சி தேர்தலில் 5-வது வார்டில் போட்டியிட்டு சொற்ப வாக்குகள் பெற்று தோல்வியடைந்துள்ளார். அதன்மூலம் பாஜக-வில் இருப்பதாக கூறி வேலை வாங்கி தருவதாகவும், டெண்டர் எடுத்து தருவதாகவும் கூறி மோசடியில் ஈடுபட்டு வந்துள்ளார். இதனால் பாஜக தலைமை விஜயபானுவை 2023 ஆம் ஆண்டு அடிப்படை உறுப்பினர் பதவியில் இருந்து நீக்கியது.

அதன்பின் சேலம் வந்த விஜயபானு தான் திமுக ஆதரவாளர் என்ற தோற்றத்தை ஏற்படுத்தியுள்ளார். அதற்காக அவர் செய்த செயல்கள் ஏராளம்... நடந்து முடிந்த நாடாளுமன்ற தேர்தலில் 40-40 இடங்களை திமுக கூட்டணி வென்றதால், அதற்காக சேலம் மாநகர் முழுவதும் வெற்றி பெற்றதற்கு வாழ்த்துக்கள் தெரிவித்து, அரசியல் புள்ளிகளின் போட்டோ போட்டு போஸ்டர் அடித்து ஒட்டியுள்ளார். அதுமட்டுமல்லாமல் சேலம் மாநகராட்சி மேயர் ராமச்சந்திரனை வைத்து நலத்திட்ட உதவிகள் வழங்கியுள்ளார்.

இதே போன்று 2012 ஆம் ஆண்டு விஜய பானு மீது மேலும் ஒரு மோசடி புகார் வந்து கைது செய்யப்பட்டுள்ளார்.

வேலூரில் போலி ஐ.பி.எஸ் வேடம்!

வேலூர் மாவட்டம் தொரப்பாடி பகுதியை சேர்ந்தவர் விஜயா. இவர் சென்னை புழல் பெண்கள் தனிச்சிறையில் 2007 முதல் 2010 வரை முதல் நிலை காவலராக பணிபுரிந்த காலத்தில், திருட்டு வழக்கில் கைது செய்யப்பட்டு சிறையில் இருந்த விஜய பானு என்கிற ஷீபா மேத்யூ தன்னை டெல்லியில் சிறப்பு தொழில் பிரிவில் ஐபிஎஸ் அதிகாரியாக இருப்பதாகவும் ஜெயிலில் நடக்கும் ஊழலை கண்டு அறிய திருட்டு வழக்கில் வந்து இருப்பதாகவும் சொல்லி அறிமுகமாகியுள்ளார். இதனை விஜயாவும் நம்பியுள்ளார். பின்னர் சிறையில் இருந்து வெளியே வந்த விஜய பானு அடிக்கடி விஜயாவை வீட்டிற்கு சென்று பார்ப்பதும் பழகுவதுமாக இருந்துள்ளார்.

ஒரு கட்டத்தில் கடந்த 2011 ஆம் ஆண்டு விஜய பானு தனது உதவியாளர் வெங்கடேசன் மதிவாணன் என்பவர் உடன் விஜயா வீட்டிற்கு சென்று சிஎம்சி யில் மேம்பாலம் கட்ட காண்ட்ராக்ட் எடுத்துள்ளேன் அதற்கு பணம் குறைகிறது என்றும் அதனால் வீட்டில் இருக்கும் நகைகளை கொடு, நான் இரண்டு நாட்களில் திருப்பித் தருகிறேன் என்று கேட்டு கொண்டதால் விஜயாவும் 22 சவரன் நகைகளை கொடுத்துள்ளார். இதனை வெங்கடேசன் பெயரில் வேலூரில் தோட்டப்பாளையத்தில் உள்ள வங்கியில் வைத்து பணம் பெற்று வருமாறு சொல்லியுள்ளார். மேலும் விஜய பானு தன்னை ஒரு ஐபிஎஸ் அதிகாரி என்று நம்ப வைத்தும் அன்னை தெரசா தொண்டு நிறுவனம் நடத்துவதாகவும் பத்திரிகையில் துணை ஆசிரியராகவும் உள்ளதாக கூறி நம்ப வைத்து ஏமாற்றியுள்ளார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்https://bit.ly/3OITqxs

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3OITqxs