சொந்த வீடு கட்ட போறீங்களா? உங்கள் பட்ஜெட்டில் கடைபிடிக்க வேண்டிய `13' கோல்டன் ரூல்ஸ்!

'வீட்டைக் கட்டிப்பார்; கல்யாணத்தை செஞ்சு பாரு' என்ற சொலவடையை நிச்சயம் நாம் கடக்காமல் இருந்திருக்க மாட்டோம்.

இந்த சொலவடையில் அவர்கள் முக்கியமாக கூறுவது 'பட்ஜெட்டை' தான்.

வீடு கட்டப்போகிறோம் என்று ஆகிவிட்டால், 'இந்த' விஷயங்களுக்கு எல்லாம் தெளிவாக பட்ஜெட்டை போட்டுவிடுங்கள் என்று லிஸ்ட்டை பட்டியலிடுகிறார் ரியல் எஸ்டேட் ஆலோசகர் மற்றும் வழக்கறிஞர் முத்துசாமி.

"1. இது தேவையில்லாத செலவு என்று தோன்றலாம். ஆனால், இது தான் மிக முக்கியமான செலவு. நீங்கள் கட்டடம் கட்டப்போகும் நிலம் எப்படி இருக்கிறது, அது கட்டடத்தை தாங்குமா? என்பதை தெரிந்துகொள்வது அவசியம். ஆக, முதலில் 'மண் பரிசோதனை'க்கு காசு எடுத்து வைத்துவிடுங்கள்.

2. வரைப்படம் - ஆசை ஆசையாய் பார்த்து பார்த்து கட்டும் வீடு எப்படி இருக்க வேண்டும் என்பதற்கான பக்காவான- அரசின் வரையறுக்கப்பட்டுள்ள விதிகளின் படி- குடும்ப தேவைகளை பூர்த்தி செய்யும் வீட்டு வரைபடத்திற்கு அடுத்த செலவு.

3. 'அந்த நிலத்திற்கான அளவீடு மற்றும் அதற்குண்டான சட்டதிட்டதின் படி தான், நம்முடைய கட்டடத்தில் அறைகள், மாடி, பால்கனி, கழிவறை போன்றவை அமைந்துள்ளதா? ஒப்புதல்களுக்கு பிளான் அப்ரூவல் மற்றும் சார்ந்த ஃபீஸை ரெடி செய்துவிடுங்கள்.

4. தேவைப்பட்டால் 'தடையில்லா சான்றிதழ்'களுக்கும் அப்ளை செய்ய வேண்டும். அதற்கும் தனி கட்டணம் உண்டு.

5. 'இவர் இல்லையேல், கட்டடமே இல்லை' அதனால், சிவில், கட்டமைப்பு, எலக்ட்ரிகல் மற்றும் பிளம்பிங் நுணுக்கங்களை அறிந்த இன்ஜீனியருக்கான கட்டணத்தை சரியாக முன்னரே பேசி முடிவு செய்துவிடுங்கள்.

6. கட்டட மற்றும் சார்ந்த நிபுணர்கள், தொழிலாளர்களுக்கான சம்பளம் - இதை முதலிலேயே தெளிவாக பேசிவிடுங்கள். இன்ஜினீயர் மற்றும் கட்டிடகலை நிபுணர் ஃபீஸும், இதையும் பக்காவாக முடித்துவைத்துக் கொள்வது மிகவும் நல்லது. அப்போது தான், கட்டடம் வளரும்போது தேவையில்லாத பிரச்னைகள் ஏற்படாது.

7. நீங்கள் எந்த கட்டிட மெட்டீரியல்களை கட்டடத்திற்கு பயன்படுத்த விரும்புகிறீர்கள்? அது எத்தனை ரூபாய்? மொத்தமாக எவ்வளவு செலவு ஆகும் என்பதை முதலிலேயே ஆராய்ந்து சரி பார்த்து கணக்கு போட்டு பணத்திற்கான ஏற்பாட்டை செய்துவிடுங்கள்.

8. வீட்டிற்கான ஆழ்துளை கிணறு மற்றும் திறந்தவெளி கிணறு தோண்டுவதற்கும் பட்ஜெட்டில் கொஞ்சம் பணத்தை ஒதுக்கிவிடுங்கள்.

9. மின்சாரம் மற்றும் பிளம்பிங், கீழ் தரை மற்றும் மாடி டைல்ஸ், தண்ணீர்த்தொட்டி, சார்ந்த வேலைகளுக்கும் பணம் தேவை.

10. தண்ணீர் டேங்க், நிலத்தடி நீர் பைப்புகள், மெட்ரோ மற்றும் முனிசிபல் நீர், கழிவு நீர், திட கழிவு அகற்றல், மழை நீர் வடிகால் போன்றவற்றை வீடு கட்டும்போதே சரியாக செய்துவிட்டால் பின்னர் பிரச்னைகள் எழாது.

11. காம்பவுண்ட் சுவர் மற்றும் சார்ந்த மின்விளக்கு, வீட்டு முகப்பு மற்றும் வெளித்தோற்றம், பெயின்டிங் மற்றும் அலங்கார வேலைப்பாடுகள், வெளி கேட் மற்றும் நுழைவாயில் உண்டான செலவுகள் பட்ஜெட் செய்து கொள்ளுதல் வேண்டும்.

12. லிஃப்ட், ஜெனரேட்டர், சிசிடிவி, போன்ற செலவுகளை தேவைப்பட்டால் மட்டும் செய்யுங்கள்.

13. சைட் கிளியரன்ஸ்- சாலை கடந்து செல்லும் மற்றும் அக்கம் பக்கம் உள்ளவர்களுக்கு தொந்தரவு இல்லாதவாறு கட்டிடம் கட்டுவது மிக மிக முக்கியம். இதை கட்டாயம் செய்துவிடுங்கள்.

இதை சரியாக, தெளிவாக செய்துவிட்டாலே, நீங்கள் பாதி கட்டடத்தை சூப்பராக முடித்துவிட்டீர்கள் என்று பொருள் கொள்ளலாம்" என்கிறார் வழக்கறிஞர் முத்துசாமி.

Vikatan WhatsApp Channel

இணைந்திருங்கள் விகடனோடு வாட்ஸ்அப்பிலும்... CLICK BELOW LINK

https://bit.ly/VikatanWAChannel