டி20 போட்டிகளில் 2024-ஆம் ஆண்டின் சிறந்த வீரர் விருதை வென்ற இந்திய வீரர்!

டி20 போட்டிகளில் கடந்த ஆண்டுக்கான ஐசிசி சிறந்த வீரர் விருதினை இந்திய அணியின் வேகப் பந்துவீச்சாளர் அர்ஷ்தீப் சிங் வென்றுள்ளார்.

சர்வதேச டி20 போட்டிகளில் கடந்த ஆண்டில் சிறப்பாக செயல்பட்ட அர்ஷ்தீப் சிங், சிக்கந்தர் ராஸா, டிராவிஸ் ஹெட் மற்றும் பாபர் அசாம் ஆகியோர் இந்த விருதுக்கான போட்டியில் இடம்பெற்றிருந்தனர். இவர்களில் இந்திய அணியின் வேகப் பந்துவீச்சாளர் அர்ஷ்தீப் சிங்கை வெற்றியாளராக ஐசிசி அறிவித்துள்ளது.

இதையும் படிக்க: ஐசிசி வெளியிட்ட 2024-ஆம் ஆண்டின் சிறந்த டி20 அணி; இடம்பிடித்த 3 இந்திய வீராங்கனைகள்!

டி20 உலகக் கோப்பையை வென்ற இந்திய அணியில் அர்ஷ்தீப் சிங் இடம்பெற்றிருந்தார். கடந்த 2022 ஆம் ஆண்டு அறிமுகமான அர்ஷ்தீப் சிங், தன்னை அணியில் பிரதான பந்துவீச்சாளர்களில் ஒருவராக நிலைநிறுத்திக் கொண்டார். கடந்த ஆண்டு அவருக்கு மிகவும் சிறப்பான ஆண்டாக அமைந்தது.

அதிலும் குறிப்பாக, டி20 உலகக் கோப்பை இறுதிப்போட்டியில் தென்னாப்பிரிக்காவுக்கு எதிராக சிறப்பாக பந்துவீசியது அவருக்கு மறக்க முடியாத நினைவாக அமைந்தது. இறுதிப்போட்டியில் 4 ஓவர்கள் வீசிய அவர், வெறும் 20 ரன்களை மட்டும் விட்டுக் கொடுத்து 2 விக்கெட்டுகளைக் கைப்பற்றினார்.

டி20 போட்டிகளில் அர்ஷ்தீப் சிங் சாதனை

கடந்த ஆண்டில் மட்டும் 18 சர்வதேச டி20 போட்டிகளில் விளையாடிய அர்ஷ்தீப் சிங், 36 விக்கெட்டுகளைக் கைப்பற்றி சாதனை படைத்தார். சர்வதேச டி20 போட்டிகளில் ஓராண்டில் அதிக விக்கெட்டுகளை வீழ்த்திய 4-வது வீரர் என்ற சாதனையை அவர் படைத்தார்.

அதிலும், குறைந்த போட்டிகளில் இந்த சாதனையை அர்ஷ்தீப் சிங் படைத்துள்ளார். மற்ற வீரர்கள் இந்த சாதனையைப் படைக்க அதிக போட்டிகளை எடுத்துக் கொண்டுள்ளனர்.

இதையும் படிக்க: ஐசிசியின் 2024 டி20 அணியில் ரோஹித் கேப்டன்..! 4 இந்தியர்கள் தேர்வு!

அண்மையில், டி20 போட்டிகளில் இந்திய அணிக்காக அதிக விக்கெட்டுகளை வீழ்த்திய வீரர் என்ற சாதனையை அர்ஷ்தீப் சிங் படைத்தது குறிப்பிடத்தக்கது.