தஞ்சாவூரில் முன்னாள் எம்எல்ஏ வீட்டில் ஊழல் தடுப்பு காவல் பிரிவினா் சோதனை!

தஞ்சாவூரில் அதிமுக முன்னாள் எம்எல்ஏவும், தற்போதைய அமமுக துணைப் பொதுச் செயலருமான எம். ரெங்கசாமி வீட்டில் ஊழல் தடுப்பு காவல் பிரிவினா் வெள்ளிக்கிழமை திடீா் சோதனை மேற்கொண்டனா்.

தஞ்சாவூா் அருகே தளவாய்ப்பாளையம் வீரையன் நகரில் வசிப்பவா் எம். ரெங்கசாமி. அதிமுகவில் இருந்த இவா் தஞ்சாவூா் தொகுதியில் 2011 ஆம் ஆண்டு தோ்தலில் வென்று எம்எல்ஏ ஆனாா். தொடா்ந்து 2016 தோ்தலிலும் வென்ற இவா் டிடிவி. தினகரன் அணிக்குச் சென்றாா்.

இவா் எம்எல்ஏவாக இருந்த காலத்தில் வருமானத்துக்கு அதிகமாகச் சொத்து சோ்த்ததாக ஊழல் தடுப்பு காவல் பிரிவினருக்கு புகாா்கள் சென்றன. இதன் பேரில், ரெங்கசாமி இவரது மனைவி ஆா். இந்திரா, இளைய மகன் வினோபாரத் ஆகியோா் மீது தஞ்சாவூா் ஊழல் தடுப்பு மற்றும் கண்காணிப்பு காவல் பிரிவினா் வியாழக்கிழமை வழக்குப் பதிந்தனா். அதில் 2011 மே 1 முதல் 2017, செப்டம்பா் 30 வரை வருமானத்துக்கு அதிகமாக ரூ. 1.49 கோடிக்கு சொத்து சோ்த்தது தெரிய வந்ததாகக் குறிப்பிடப்பட்டுள்ளது.

இதைத் தொடா்ந்து, ரெங்கசாமி வீட்டில் தஞ்சாவூா் ஊழல் தடுப்பு மற்றும் கண்காணிப்பு பிரிவு காவல் துணைக் கண்காணிப்பாளா் ஆா். அன்பரசன் தலைமையில் காவல் ஆய்வாளா்கள் பத்மாவதி, சரவணன், அருண் பிரசாத் உள்ளிட்டோா் வெள்ளிக்கிழமை காலை 7 மணி முதல் பிற்பகல் 1.30 மணி வரை சோதனை நடத்தினா்.

அப்போது ரெங்கசாமி சென்னையில் இருந்ததால், அவரது குடும்பத்தினரிடம் விசாரணை நடத்தி, வங்கிக் கணக்கு புத்தகங்கள் உள்ளிட்டவற்றைக் கைப்பற்றினா். சொத்து ஆவணங்கள் வங்கியில் இருப்பதாக குடும்ப உறுப்பினா்கள் கூறியதால், அதுதொடா்பாக ஆய்வு செய்த பிறகு மேலும் தகவல்கள் தெரியவரும் எனக் கூறப்படுகிறது.