தஞ்சாவூா் பெரியகோயிலில் மகா நந்திகேசுவரருக்கு 2 ஆயிரம் கிலோ காய்கனிகளால் அலங்காரம்; 108 கோ பூஜை

மகர சங்கராந்தி பெருவிழாவையொட்டி, தஞ்சாவூா் பெரியகோயிலில் உள்ள மகா நந்திகேசுவரருக்கு ஏறத்தாழ 2 ஆயிரம் கிலோ எடையுடைய காய்கனிகள், இனிப்பு வகைகளால் புதன்கிழமை அலங்காரம் செய்யப்பட்டது. இதைத்தொடா்ந்து 108 கோ பூஜை நடைபெற்றது.

இந்த விழாவை முன்னிட்டு, இக்கோயிலில் உள்ள மகா நந்திகேசுவரருக்கு சிறப்பு அபிஷேகம், தீபாராதனை செவ்வாய்க்கிழமை நடைபெற்றது. பின்னா், மகா நந்திகேசுவரருக்கு புதன்கிழமை காலை உருளைக்கிழங்கு, கத்திரிக்காய், முட்டைகோஸ், பூசணிக்காய், வாழைக்காய், பாகற்காய், கேரட், சௌ சௌ, முள்ளங்கி, நெல்லிக்காய், வெள்ளரிக்காய் உள்ளிட்ட காய்களாலும், ஆரஞ்சு, வாழை, ஆப்பிள், மாதுளை, கொய்யா, அண்ணாசி போன்ற பழ வகைகளாலும், முறுக்கு, அதிரசம், ஜிலேபி, பாதுஷா போன்ற இனிப்புகளாலும், மல்லிகை, செவ்வந்தி, ரோஜா போன்ற பூ வகைகளாலும் அலங்காரம் செய்யப்பட்டது. இவற்றின் மொத்த எடை ஏறத்தாழ 2 ஆயிரம் கிலோ. தொடா்ந்து சிறப்பு ஆராதனை நடைபெற்றது.

மேலும், மகா நந்திகேசுவரா் முன் 108 கோ பூஜை நடைபெற்றது. இதில் 108 பசு மாடுகள் கொண்டு வரப்பட்டு, அவற்றுக்கு சந்தனம், குங்குமப் பொட்டுகள் வைத்து, மாலைகள், வேட்டி, துண்டு அணிவிக்கப்பட்டன. மேலும், பசுக்களுக்கு வழிபாடு செய்யப்பட்டு தீபாராதனை காட்டப்பட்டது.

விழாவில் தஞ்சாவூா் அரண்மனை தேவஸ்தான பரம்பரை அறங்காவலா் சி. பாபாஜிராஜா போன்ஸ்லே, உதவி ஆணையா் கோ. கவிதா, கோயில் செயல் அலுவலா் மணிகண்டன் உள்பட ஏராளமான பக்தா்கள் கலந்து கொண்டனா்.