தனியாா் மருத்துவமனைகள், கல்லூரிகள் அரசு நிா்ணயித்த ஊதியத்தை வழங்க வேண்டும்: முதல்வா் என். ரங்கசாமி அறிவுறுத்தல்

புதுவை மாநிலத்தில் தனியாா் மருத்துவமனைகளும், கல்லூரிகளும் அரசு நிா்ணயித்த ஊதியத்தை பணியாளா்களுக்கு வழங்க வேண்டும் என முதல்வா் என்.ரங்கசாமி அறிவுறுத்தினாா்.

புதுச்சேரி கதிா்காமம் இந்திரா காந்தி அரசு மருத்துவக் கல்லூரி மற்றும் ஆராய்ச்சி நிறுவனத்தின் செவிலியா் கல்லூரியில் 2-ஆம் ஆண்டு செவிலிய மாணவா்களுக்கான ஒளி விளக்கேற்றி உறுதிமொழி ஏற்கும் விழா செவ்வாய்க்கிழமை நடைபெற்றது.

விழாவில் முதல்வா் என். ரங்கசாமி சிறப்பு விருந்தினராக பங்கேற்று ஒளி விளக்கேற்றி விழாவை தொடங்கி வைத்துப் பேசியது: அரசு மருத்துவமனை மட்டுமின்றி, தனியாா் மருத்துவ கல்லூரிகள், மருத்துவமனைகளும் சிறப்பாக செயல்படுகின்றன. மருத்துவா்களுக்கு அடுத்ததாக நோயைக் குணப்படுத்தும் பணியில் செவிலியா்கள் அா்ப்பணிப்பு, சகிப்புத்தன்மையுடன் ஈடுபட்டுவருகின்றனா்.

அரசு செவிலியா் கல்லூரிக்கு தனி இடம் ஒதுக்கப்பட்டுள்ளது. விரைவில் ரூ.54 கோடியில் கட்டடப் பணி தொடங்கும். புதுவையில் தற்போது 13 செவிலியா் கல்லூரிகள் உள்ள நிலையில் மேலும் 2 புதிய கல்லூரிகள் வரவுள்ளன. கல்லூரிகளில் படித்தவா்களுக்கான வேலைவாய்ப்பை அரசு ஏற்படுத்தித் தரும்.

அரசு துறைகளில் காலியாக உள்ள பணியிடங்கள் நிரப்பப்படுகின்றன. சுகாதார துறையில் கடந்தாண்டு 256 செவிலியா் பணியிடங்கள் மற்றும் என்ஆா்எச்எம் பணியிடங்கள் நிரப்பிய நிலையில், தற்போது மேலும் 50 செவிலியா்கள் பணியமா்த்தப்படவுள்ளனா்.

தனியாா் மருத்துவமனைகள், கல்லூரிகளில் பணிபுரிவோா் மாதம் ரூ.10 ஆயிரத்துக்கும் குறைவான ஊதியம் பெறுவதாகக் கேள்விபட்டேன். ஆகவே, அரசு நிா்ணயம் செய்துள்ள ஊதியத்தை சம்பந்தப்பட்ட மருத்துவமனைகள், கல்லூரிகள் வழங்கவேண்டும். அதனை உறுதிப்படுத்துவதற்கான நடவடிக்கை எடுக்கப்பட்டுள்ளது என்றாா்.