தமிழக ஆளுநரை பதவி நீக்கம் செய்ய வேண்டும்: குடியரசுத் தலைவருக்கு வே.நாராயணசாமி வலியுறுத்தல்

புதுச்சேரி: தமிழக ஆளுநா் ஆா்.என்.ரவியை, குடியரசுத் தலைவா் பதவி நீக்கம் செய்ய வேண்டும் என புதுவை மாநில முன்னாள் முதல்வா் வே.நாராயணசாமி வலியுறுத்தியுள்ளாா்.

புதுச்சேரியில் திங்கள்கிழமை அவா் செய்தியாளா்களிடம் கூறியது: தமிழக ஆளுநா் ஆா்.என்.ரவி தேவையற்ற காரணங்களை கூறி தனது உரையை புறக்கணித்து வெளியேறியுள்ளாா்.

தமிழக அரசின் கொள்கை, செயல் திட்டங்களை அமைச்சரவை முடிவு செய்து ஆளுநருக்கு அனுப்பும் போது, அதை ஏற்று பேரவையில் அவா் படிக்க வேண்டும்.

கடந்த முறை அவா் அமைச்சரவை முடிவு செய்த உரையை திருத்திப் படித்தாா். அந்த சா்ச்சையை தொடா்ந்து, தற்போது மீண்டும் ஒரு சா்ச்சையை அவா் ஏற்படுத்தியுள்ளாா்.

ஆளுநா் உரை முடிந்த பின், அதன் மொழியாக்கத்தை சட்டப்பேரவைத் தலைவா் படிக்க வேண்டும். அதன் பின்னரே தேசிய கீதம் இசைக்கப்படும்.

தமிழக அரசுக்கும், முதல்வருக்கும், மக்களுக்கும் ஆளுநா் களங்கத்தை ஏற்படுத்தியிருக்கிறாா்.

ஆளுநருக்கு என்று தனி அதிகாரம் எதுவும் கிடையாது.

அமைச்சரவை எடுத்த முடிவை படிக்க வேண்டுமே தவிர, அதில் சோ்க்கவோ, குறைக்கவோ அவருக்கு அதிகாரம் கிடையாது.

அரசுக்கு கொடுக்க வேண்டிய மரியாதையை கொடுக்கத் தவறிய தமிழக ஆளுநா் ஆா்.என்.ரவியை குடியரசுத் தலைவா் பதவி நீக்கம் செய்ய வேண்டும் என்றாா் அவா்.