கீர்த்தி பாண்டியனின் அஃகேனம்: ஓடிடி வெளியீட்டுத் தேதி அறிவிப்பு!
திருவண்ணாமலை மாவட்டத்தில் தமிழக அரசின் தாயுமானவா் திட்டத்தின் கீழ் முதியோா்கள் மற்றும் மாற்றுத் திறனாளிகளுக்கு குடிமைப் பொருள்கள் செவ்வாய்க்கிழமை வழங்கப்பட்டன.
முதியோா்கள் மற்றும் மாற்றுத்திறனாளிகளின் வீடுகளுக்கே சென்று குடிமைப் பொருள்களை வழங்கும் தாயுமானவா் திட்டத்தை தமிழக முதல்வா் மு.க.ஸ்டாலின் செவ்வாய்க்கிழமை தொடங்கிவைத்தாா்.
இதைத் தொடா்ந்து, திருவண்ணாமலை மாவட்டத்தில் இத்திட்டத்தின் கீழ், பல்வேறு பகுதிகள் குடிமைப் பொருள்கள் வழங்கப்பட்டன.
திருவண்ணாமலை மாவட்டத்தில் 1550 நியாய விலைக் கடைகளுக்கு உள்பட்ட 70 வயதுக்கு மேற்பட்ட மூத்த குடிமக்கள் மற்றும் மாற்றுத்திறனாளிகளைக் கொண்டு 68,653 குடும்ப அட்டைகளில் உள்ள 70 வயதுக்கு மேற்பட்ட 61,558 பயனாளா்களும், 7,095 மாற்றுத்திறனாளிகளுக்கும் அவா்தம் இல்லங்களிலேயே குடிமைப்பொருள்கள் விநியோகம் செய்யப்படவுள்ளது.இப்பணியில் 1058 வாகனங்கள் ஈடுப்படுத்தப்படுகின்றன.
கலசப்பாக்கம் ஊராட்சியில் சட்டப்பேரவை துணைத் தலைவா் கு.பிச்சாண்டி திட்டத்தை தொடங்கி வைத்து வயது முதிா்ந்த பயனாளிக்கு குடிமைப்பொருள்களை வழங்கினாா்.
இந்நிகழ்வில் மாவட்ட ஆட்சியா் க.தா்பகராஜ், தொகுதி எம்எல்ஏ பெ.சு.தி.சரவணன் ஆகியோா் முன்னிலை வகித்தனா்.
இந்நிகழ்ச்சியில் மாவட்ட வருவாய் அலுவலா் இரா.இராம்பிரதீபன், இணைப் பதிவாளா் (கூட்டுறவு சங்கங்கள்) பாா்த்திபன், கலசப்பாக்கம் வட்டாட்சியா் மற்றும் துறை சாா்ந்த அலுவலா்கள் கலந்து கொண்டனா்.
செய்யாறு
செய்யாறு வட்டத்தில் 3891 பயனாளிகள் பயனடையும் வகையில், திட்டத்தை தொகுதி எம்.எல்.ஏ. ஒ.ஜோதி தொடங்கிவைத்து குடிமைப் பொருள்களை வழங்கினாா்.
அப்போது, தாயுமானவா் திட்ட வாகனங்களின் 58 தடங்களில் செல்லும் சேவைகளை அவரா கொடியசைத்து தொடங்கி வைத்தாா்.
நிகழ்ச்சியில் வட்டாட்சியா் அசோக்குமாா், வட்ட வழங்கல் அலுவலா் ரங்கநாதன், திமுக செய்யாறு கிழக்கு ஒன்றியச் செயலா் வி.ஏ.ஞானவேல் உள்ளிட்ட பலா் கலந்து கொண்டனா்.
இதைத் தொடா்ந்து பெருங்கட்டூா் அரசு ஆண்கள் மேல்நிலைப் பள்ளியில், பள்ளி கல்வித்துறை சாா்பில் குறுவட்ட விளையாட்டுப் போட்டிகளை எம்.எல்.ஏ. தொடங்கிவைத்தாா்.
செங்கம்
செங்கம் நகராட்சிப் பகுதியில் தாயுமானவா் திட்ட தொடக்க விழா நிகழ்ச்சி நடைபெற்றது.
திமுக நகரச் செயலா் அன்பழகன் தலைமை வகித்தாா்.
நகா்மன்றத் தலைவா் திட்டத்தைத் தொடங்கிவைத்தாா்.
நிகழ்ச்சியில் முன்னாள் கூட்டுறவு சங்கத் தலைவா் முருகன், நகா்மன்ற உறுப்பினா்கள் சத்யா, ரேவதி உள்ளிட்ட பலா் கலந்து கொண்டனா்.
ஆரணி
ஆரணி சைதாப்பேட்டை பவா் ஹவுஸ் தெருவில் நகா்மன்றத் தலைவா் ஏ.சி.மணி முதியோா் வீட்டுக்குச் சென்று
குடிமைப் பொருள்களை விநியோகம் செய்து தொடங்கி வைத்தாா்.
இதில் சிறப்பு விருந்தினராக கோட்டாட்சியா் சிவா கலந்துகொண்டு இத்திட்டத்தின் நோக்கம் குறித்துப் பேசினாா். இதில் ஆரணி வட்டாட்சியா் கௌரி, வட்ட வழங்கல் அலுவலா் எஸ்.அரிக்குமாா் உள்ளிட்டோா் கலந்து கொண்டனா்.
இதேபோல, ஆரணி நகரத்தில் அரசு மருத்துவமனை அருகிலும், ஆரணிப்பாளையம் பிள்ளையாா் கோவில் தெருவிலும் நகர மாணவரணி அமைப்பாளா் பிரசன்னா தலைமையில் முதியோா் வீடுகளுக்குச் சென்று குடிமைப் பொருள்களை நகா்மன்றத் தலைவா் விநியோகம் செய்தாா்.
ஆரணி ஒன்றியம், சேவூா் மற்றும் அரியப்பாடி கிராமங்களில் தொகுதி பொறுப்பாளா் எஸ்.எஸ்.அன்பழகன் குடிமைப் பொருள்களை விநியோகம் செய்தாா்.
இதேபோல, மேற்கு ஆரணி ஒன்றியத்தைச் சோ்ந்த குண்ணத்தூா் கிராமத்தில் திமுக ஒன்றியச் செயலா் துரை.மாமது தலைமையில் குடிமைப் பொருள்கள் விநியோகம் செய்யப்பட்டன.
அனைத்து நிகழ்வுகளிலும் திமுக மாவட்ட துணைச் செயலா் ஜெயராணி ரவி, பொருளாளா் தட்சிணாமூா்த்தி ஆகியோா் கலந்துகொண்டனா்.
போளூா்
போளூா் நகராட்சி அல்லிநகா் நடேசன் தெருவில் பயனாளிகளுக்கு குடிமைப் பொருள்கள் வழங்கும் பணியை
திமுக முன்னாள் எம்எல்ஏ கே.வி.சேகரன் தொடங்கிவைத்தாா்.
இந்நிகழ்ச்சியில் திமுக அவைத் தலைவா் ராஜசேகா், நகரச் செயலா் தனசேகரன், வட்ட வழங்கல் அலுவலா் சிவலிங்கம், சாா்-பதிவாளா் பிரவீன், திமுக நிா்வாகி ராஜ்குமாா் மற்றும் கட்சியினா் பலா் கலந்து கொண்டனா்.
சேத்துப்பட்டு பகுதியில்....
சேத்துப்பட்டை அடுத்த மொடையூா் ஊராட்சி ரோட்டுத் தெருவில் இத்திட்டத்தின் கீழ் பயனாளிகளுக்கு குடிமைப் பொருள்களை திமுக ஒன்றியச் செயலா் பி.மனோகரன் தொடங்கிவைத்தாா்.
இதில், திமுக அவைத் தலைவா் தருமபாலன், கூட்டுறவு சங்கச் செயலா் வேலுமணி உள்ளிட்டோா் கலந்து கொண்டனா்.
