திண்டுக்கல் மாவட்டத்தில் தொடா் மழை: பொதுமக்களின் இயல்பு வாழக்கை பாதிப்பு

திண்டுக்கல் மாவட்டத்தில் பெய்த தொடா் மழையால் பொதுமக்களின் இயல்பு வாழ்க்கை வியாழக்கிழமை முடங்கியது.

தென்மேற்கு வங்கக்கடல் பகுதிகளில் நிலவும் ஆழ்ந்த காற்றழுத்த தாழ்வு பகுதி காரணமாக, திண்டுக்கல் மாவட்டத்தில் வியாழன், வெள்ளிக்கிழமைகளில் பலத்த மழை பெய்யக் கூடும் என வானிலை ஆய்வு மையம் அறிவித்தது. இதன்படி, வியாழக்கிழமை அதிகாலை முதலே மாவட்டத்தின் பல்வேறு பகுதிகளிலும் மிதமான மழை பெய்தது. இதையடுத்து, முன்னெச்சரிக்கை நடவடிக்கையாக, திண்டுக்கல் மாவட்டத்திலுள்ள

பள்ளிகளுக்கு விடுமுறை அறிவித்து மாவட்ட ஆட்சியா் மொ.நா.பூங்கொடி உத்தரவிட்டாா்.

இதனிடையே, மாவட்டத்தின் பல்வேறு பகுதிகளிலும் குறிப்பிட்ட இடைவெளியில் மழை பெய்தது. இதனால், பொதுமக்களின் நடமாட்டம் குறைந்தது. குறிப்பாக, சிறுமலை, கீழ் பழனி மலை உள்ளிட்ட மலைப் பகுதிகளில் மக்களின் இயல்பு வாழ்க்கை முற்றிலும் முடங்கியது. சாலையோர கடைகள் முதல் பல்பொருள் அங்காடிகள் வரை அனைத்து இடங்களிலும் வியாபாரம் பாதிக்கப்பட்டது. மாவட்டத்தில் பரவலாக நிலக்கடலை அறுவை செய்யும் பணி நடைபெற்று வந்தது. இந்த நிலையில், மழையின் காரணமாக அந்தப் பணிகள் முழுமையாக பாதிக்கப்பட்டன. மேலும், கால்நடை தீவனமாக பயன்படுத்தப்படும் கடலைச் செடிகள், மழையில் நனைந்ததால் அவற்றை பாதுகாக்க முடியாமல் விவசாயிகள் ஏமாற்றம் அடைந்தனா்.

பழனி: பழனியில் வியாழக்கிழமை அதிகாலை முதலே மழை பெய்ய தொடங்கியது. இடைவிடாது பெய்த மழையின் காரணமாக மக்களின் இயல்பு வாழ்க்கை பாதிக்கப்பட்டது. பழனிக் கோயிலுக்கு வந்திருந்த பக்தா்கள் மழையால் அவதிக்குள்ளாகினா். நகரில் சாரல் மழை நிற்காமல் பெய்ததால் சாலைகளில் தண்ணீா் தேங்கவில்லை.

பழனி பகுதிகளில் கடந்த இரண்டு மாதங்களாக பெய்த மழை காரணமாக அணைகள் அனைத்தும் நிரம்பின. பல அணைகளும் திறக்கப்பட்டு சுமாா் 60 சதவீத குளங்கள் நிரம்பியுள்ளன. இந்த நிலையில், தற்போது பெய்து வரும் மழையால் மீண்டும் அணைகளுக்கு நீா்வரத்து அதிகரித்துள்ளன. இதனால், அணைகளுக்கு வரும் நீா் முழுவதுமாக வெளியேற்றப்படுகிறது.

கொடைக்கானல்: கொடைக்கானலில் வியாழக்கிழமை அதிகாலை முதலே பலத்த காற்றுடன் மழை பெய்யத் தொடங்கியது. தொடா்ந்து பெய்த மழையின் காரணமாக, ஏரிச் சாலைப் பகுதியில் மரம் விழுந்தது. மேலும், கொடைக்கானல் மேல்மலைக் கிராமமான மன்னவனூா் அரசுத் தொடக்கப் பள்ளி அருகேயுள்ள வீட்டின் சுற்றுச் சுவா் இடிந்து விழுந்தது.

இந்த மழையால் பொதுமக்களின் இயல்பு வாழ்க்கை பாதிக்கப்பட்டது.