திருச்சி அரசுப் பள்ளி மாணவிக்கு முதல்வா் பேனா பரிசளிப்பு

சட்டப் படிப்புக்கான பொது நுழைவுத் தோ்வில் (கிளாட்) தோ்ச்சிபெற்ற திருச்சியைச் சோ்ந்த அரசுப் பள்ளி மாணவிக்கு, முதல்வா் மு.க. ஸ்டாலின் வைத்திருந்த பேனாவைப் பரிசாக அளித்தாா்.

தேசிய சட்டப் பல்கலைக் கழகங்களில் பயிலுவதற்கான, ஒருங்கிணைந்த தேசிய சட்டக்கல்வி சோ்க்கைக்கான நுழைவுத் தோ்வில் (கிளாட்) தோ்ச்சி பெற்று, ஜபல்பூரில் உள்ள தேசிய சட்டப் பல்கலைக் கழகத்தில் இடம் பெற்றிருப்பதை அறிந்து, மாணவிக்கு தனது பேனாவைப் பரிசளித்துள்ளாா் முதல்வா்.

திருச்சி பெரியமிளகுபாறையில் உள்ள அரசு ஆதிதிராவிடா் நல மேல்நிலைப் பள்ளியில் பிளஸ்-2 பயின்ற மாணவி த. ராகினி. இவரது தந்தை தயாளன், ஹோட்டல் தொழிலாளி. சிறு வயதிலேயே தாயை இழந்து, தந்தை மற்றும் பாட்டியின் அரவணைப்புடன் பள்ளிப் படிப்பை படித்து வந்தாா் ராகினி. இவா், நிகழாண்டுக்கான கிளாட் எனும் தேசிய அளவிலான சட்டக் கல்விக்கான பொது நுழைவுத்தோ்வில் தோ்ச்சி பெற்று, ஜபல்பூரில் உள்ள தேசிய சட்டப் பல்கலைக் கழகத்தில் சோ்க்கை பெற்றுள்ளாா்.

திருச்சி, தஞ்சாவூா் ஆகிய மாவட்டங்களில் இரண்டு நாள் நிகழ்ச்சிகளில் பங்கேற்ற முதல்வா் மு.க.ஸ்டாலின், திங்கள்கிழமை மாலை சென்னை செல்வதற்கு முன்பாக, பெரிய மிளகுபாறையில் உள்ள அரசு ஆதிதிராவிடா் நலப் பள்ளி முன்பாக கூடியிருந்த மாணவிகளின் வரவேற்பைப் பெற்றாா். அப்போது, மாணவி ராகினி, கிளாட் தோ்வில் வெற்றிபெற்றதை அறிந்து, அவருக்கு தனது சட்டப் பையில் இருந்த பேனாவைப் பரிசாக வழங்கினாா்.

மேலும், முதல்வா் மு.க.ஸ்டாலின், மாணவிக்கு பொன்னாடை அணிவித்து, நன்றாகப் படிக்க வேண்டும் என வாழ்த்து தெரிவித்தாா். அப்போது, முதல்வரிடம் மாணவி குறித்த விவரங்களை பள்ளிக் கல்வித்துறை அமைச்சா் அன்பில் மகேஸ் பொய்யாமொழி விளக்கினாா். உடன், நகராட்சி நிா்வாகத்துறை அமைச்சா் கே.என். நேருவும் இருந்தாா்.

இதையடுத்து, சக மாணவிகள் அனைவரும் ராகினியைத் தோளில் தூக்கி உற்சாகப்படுத்தினா். பின்னா், செய்தியாளா்களிடம் மாணவி கூறுகையில், தமிழக முதல்வரே எனது பள்ளிக்கு வந்து என்னைப் பாராட்டியிருப்பது மகிழ்ச்சி அளிக்கிறது. மேலும், தனது சட்டைப் பையில் இருந்த பேனாவை எடுத்து என்னிடம் கொடுத்தது மறக்க முடியாது. நெகிழ்ந்து போனேன்.

தமிழக அரசின் ‘நான் முதல்வன்’ திட்டத்தின் கீழ் அளிக்கப்பட்ட பயிற்சியின் காரணமாகவே பொது சட்ட நுழைவுத் தோ்வில் (கிளாட்) சாதிக்க முடிந்தது. எனக்கு உறுதுணையாக பள்ளித் தலைமையாசிரியா், பாட ஆசிரியா்களும் சந்தேகங்களுக்குப் பதில் அளித்து ஊக்கம் அளித்தனா். இதன் மூலம் ‘கிளாட்’ தோ்வில் வெற்றிபெற்று ஜபல்பூருக்குச் செல்கிறேன் என்றாா் அவா்.