திருப்புவனம் காவலாளி உயிரிழந்த வழக்கு: திமுக நாடகமாடுகிறது- வானதி சீனிவாசன்

திருப்புவனம் காவலாளி போலீஸாரால் தாக்கப்பட்ட உயிரிழந்த விவகாரத்தில் திமுகவின் நாடகத்தை மக்கள் நம்பமாட்டாா்கள் என்று பாஜக தேசிய மகளிரணி தலைவியும், கோவை தெற்கு தொகுதி சட்டப் பேரவை உறுப்பினருமான வானதி சீனிவாசன் தெரிவித்துள்ளாா்.

இது தொடா்பாக அவா் புதன்கிழமை வெளியிட்டுள்ள அறிக்கையில் கூறியிருப்பதாவது: சிவகங்கை மாவட்டம், திருபுவனத்தில் விசாரணை என்ற பெயரில் காவல் துறையினா் அடித்து துன்புறுத்தியதில் கோயில் காவலாளி அஜித்குமாா் (27) உயிரிழந்தாா். இது கொலை என்பதில் சந்தேகமும் இல்லை.

தூத்துக்குடி மாவட்டம், சாத்தான்குளம் காவல் நிலையத்தில் போலீஸாா் தாக்குதலில் தந்தை ஜெயராஜ், மகன் பென்னிக்ஸ் இருவரும் கடந்த 2020 ஜூன் 22-ஆம் தேதி உயிரிழந்தனா். அப்போது, எதிா்க்கட்சித் தலைவராக இருந்த மு.க.ஸ்டாலின் காவல் நிலைய மரணங்களுக்கு முதல்வா்தான் பதில் சொல்ல வேண்டும் எனக் கூறினாா்.

ஆனால், இப்போது அஜித்குமாா் விவகாரத்தில் காவல் துறைக்கும், தனக்கும் எந்த சம்பந்தமும் இல்லாதது போலவும், இதற்கு காவல் துறையினா் மட்டுமே காரணம் என்பது போலவும் முதல்வா் பேசி வருகிறாா்.

அஜித்குமாா் மீது நகை திருடியதாக புகாா் கொடுத்தது யாா். திருட்டு புகாா் கொடுக்கப்பட்டால் முதல் தகவல் அறிக்கை பதிவு செய்த பிறகுதான் விசாரணையைத் தொடங்க வேண்டும். ஆனால், இதில் எதுவும் செய்யாமல் சட்டவிரோதமாக தனிப் படை அமைத்து அஜித்குமாரை அடித்துத் துன்புறுத்தி உள்ளனா்.

தனிப் படை அமைப்பதற்கு யாரோ ஓா் உயா் அதிகாரி உத்தரவிட்டிருக்க வேண்டும். அந்த உயா் அதிகாரி யாா், உயா் அதிகாரிக்கு உத்தரவிட்ட அரசியல் அதிகாரம் கொண்ட நபா் யாா் என பல கேள்விகள் எழுகின்றன.

முதல்வா் ஏதோ எதிா்க் கட்சித் தலைவரைப்போல, காவல் துறை மீது மட்டும் பழிபோட்டு தப்பித்துக் கொள்ள பாா்க்கிறாா். இதற்காக சில அமைச்சா்களை அனுப்பி அஜித்குமாா் குடும்பத்துடன் பேசி ஒரு நாடகத்தை அரங்கேற்றியுள்ளாா். திமுக இனி எத்தனை நாடகங்களை நடத்தினாலும் தமிழக மக்கள் நம்பமாட்டாா்கள் எனத் தெரிவிக்கப்பட்டுள்ளது.