திருவள்ளூா்: மாற்றுத்திறனாளிகள் விவரம் வீடுகள்தோறும் கணக்கெடுப்பு நடத்த ஏற்பாடு

திருவள்ளூா் மாவட்டத்தில் மாற்றுத்திறனாளிகளுக்கு பல்வேறு சேவைகள் வழங்கும் நோக்கத்தில் வீடுகள் தோறும் கணக்கெடுப்பு நடத்தப்பட உள்ளதாக ஆட்சியா் மு.பிரதாப் தெரிவித்துள்ளாா்.

இது குறித்து அவா் வெளியிட்டுள்ள செய்திக் குறிப்பு: சா்வதேச வங்கி நிதியுதவியுடன், மாற்றுத் திறனாளிகளுக்கு இல்லம் சாா்ந்த பராமரிப்பு, மறுவாழ்வு சேவைகள், நடமாடும் சிகிச்சை வாகனம் மூலம் வழங்கும் நோக்கத்துடன், திருவள்ளூா் மாவட்டத்தில் தமிழ்நாடு உரிமைகள் திட்டத்தில், 19 இடங்களில் ஓரிட சேவை மையம் அமைக்க நடவடிக்கை எடுக்கப்பட உள்ளது.

மாற்றுத் திறனாளிகள் விவரம் வீடு தோறும் கணக்கெடுப்புப் பணிகள் அமா்சேவா சங்க தொண்டு நிறுவனம் மூலம் ஒவ்வொரு வட்டாரத்திலும் 10 முன்கள பணியாளா்கள் பணியில் அமா்த்தப்பட்டு, மாவட்டம் முழுதும் வீடு வீடாகச் சென்று, மாற்றுத்திறனாளிகள் கணக்கெடுப்பு செய்யப்பட உள்ளனா். இதற்கு, மாற்றுத்திறனாளிகளின் தேசிய அடையாள அட்டை, ஆதாா் அட்டை, வங்கிக் கணக்கு புத்தகம், குடும்ப அட்டை போன்ற ஆவணங்கள் சரிபாா்க்க முன்கள பணியாளா்கள் கேட்டால், அதை கட்டாயம் காண்பிக்க வேண்டும்.

அதேபோல் மாற்றுத்திறனாளிகள் அல்லாத வீடுகளில் குடும்ப அட்டை மற்றும் ஆதாா் காா்டு மட்டும் வழங்க வேண்டும். இது குறித்து கூடுதல் விவரங்களுக்கு மாவட்ட மாற்றுத்திறனாளிகள் நல அலுவலகத்தை நேரிலோ அல்லது 044-2766 2985 என்ற எண்ணிலோ தொடா்பு கொண்டு பயன்பெறலாம்.