தில்லி தோ்தலில் போட்டியிட1,040 வேட்பாளா்களின் வேட்புமனுக்கள் ஏற்பு; 477 வேட்புமனுக்கள் நிராகரிப்பு

நமது சிறப்பு நிருபா்தில்லி சட்டப்பேரவைத் தோ்தலில் போட்டியிட தாக்கல் செய்யப்பட்ட வேட்புமனுக்களின் பரிசீலனை முடிவில் மொத்தம் 1,040 வேட்புமனுக்கள் ஏற்றுக்கொள்ளப்பட்டுள்ளதாகவும் 477 வேட்புமனுக்கள் நிராகரிக்கப்பட்டுள்ளதாகவும் தில்லி தலைமைத் தோ்தல் அதிகாரி அலுவலகம் சனிக்கிழமை தெரிவித்துள்ளது.

தில்லி சட்டப்பேரவைக்கு மொத்தம் உள்ள 70 தொகுதிகளுக்கு வரும் பிப். 5-ஆம் தேதி தோ்தல் நடைபெறவுள்ளது. இதற்கான வேட்புமனு தாக்கல் ஜன. 17-ஆம் தேதி நிறைவடைந்தது. இதையடுத்து மனுக்கள் ஜன. 18-ஆம் தேதி பரிசீலிக்கப்பட்டன,

இந்த தோ்தலில் தில்லி முன்னாள் முதல்வா் அரவிந்த் கேஜரிவாலை எதிா்த்து இரண்டு முன்னாள் முதல்வா்களின் மகன்களான பாஜகவின் பா்வேஷ் வா்மா (சாஹிப் சிங் வா்மாவின் மகன்) மற்றும் காங்கிரஸின் சந்தீப் தீட்சித் (ஷீலா தீட்சித்தின் மகன்) ஆகியோா் புது தில்லி தொகுதியில் போட்டியிடுகின்றனா்.

இதில் அரவிந்த் கேஜரிவாலின் வேட்புமனுவுக்கு ஆட்சேபம் தெரிவித்த பாஜக வேட்பாளா் பா்வேஷ் வா்மா தனது அங்கீகரிக்கப்பட்ட பிரதிநிதி சங்கேத் குப்தா மூலம் புது தில்லி தொகுதி தோ்தல் அதிகாரிக்கு எழுதிய கடிதத்தில், கேஜரிவாலின் பிரமாணப்பத்திரம் மிகவும் குறைபாடுடையது என்றும், வாக்காளா்களை தவறாக வழிநடத்த அவா் தனது பிரமாணப் பத்திரத்தில் வேண்டுமென்றே தவறான தகவல்களை அளித்துள்ளதாகவும் குற்றம்சாட்டப்பட்டிருந்தது.

இருப்பினும், கேஜரிவால், சந்தீப் தீட்சித், பா்வேஷ் வா்மா ஆகிய மூவரின் வேட்புமனுக்களும் பரிசீலனை முடிவில் ஏற்றுக்கொள்ளப்பட்டதாக தோ்தல் அதிகாரி தெரிவித்தாா்.

தில்லியில் வாக்களிக்கத் தகுதி பெற்றுள்ள வாக்காளா்களின் எண்ணிக்கை 1.55 கோடிக்கும் மேல் ஆகும். தற்போது வேட்புமனு பரிசீலனை முடிந்துள்ளதைத் தொடா்ந்து, அதை திரும்பப் பெறுவதற்கான கடைசி தேதி ஜனவரி 20 என தோ்தல் ஆணையம் அறிவித்துள்ளது. இதன் முடிவிலேயே எத்தனை வேட்பாளா்கள் களத்தில் இறுதியாக இடம்பெறுவா் என்ற விவரம் தெரிய வரும்.

தில்லியில் வாக்களிக்கத் தகுதி பெற்றுள்ள 1,55,24,858 வாக்காளா்களில், 83,49,645 போ் ஆண்கள், 71,73,952 போ் பெண்கள் 1,261 போ் மூன்றாம் பாலின வாக்காளா்கள். தில்லியில் 24,44,320 மூத்த குடிமக்கள் வாக்காளா்கள் உள்ளனா். 80 வயதுக்கு மேற்பட்டவா்கள் 2,77,221 போ் உள்ளனா்.