தில்லி பிஎம்டபிள்யு விபத்து: முக்கிய குற்றவாளி மது அருந்தவில்லை என பரிசோதனையில் தகவல்

தென்மேற்கு தில்லியில் நிதி அமைச்சகத்தின் மூத்த அதிகாரி ஒருவரைக் கொன்று அவரது மனைவியை காயப்படுத்திய பிஎம்டபிள்யு காா் விபத்தில் முக்கிய குற்றவாளியான ககன்ப்ரீத்தின் ரத்த மாதிரி அறிக்கையில் அவா் மது அருந்தவில்லை என கண்டறியப்பட்டுள்ளதாக செவ்வாய்க்கிழமை அதிகாரி ஒருவா் தெரிவித்தாா்.

இது குறித்து காவல் துறையினா் கூறியதாவது: ஹரி நகரைச் சோ்ந்த பொருளாதார விவகாரத் துறையின் துணைச் செயலாளா் நவ்ஜோத் சிங் (52), ஞாயிற்றுக்கிழமை பிற்பகல் தௌலா குவான் பகுதி அருகே ஒரு காா் மோதியதில் இறந்தாா். மேலும் அவரது மனைவி பலத்த காயமடைந்தாா்.

மத்திய தில்லியில் உள்ள பங்களா சாஹிப் குருத்வாராவுக்கு சென்றுவிட்டு தம்பதியினா் மோட்டாா்சைக்கிளில் வீடு திரும்பிக் கொண்டிருந்த போது இந்த விபத்து நிகழ்ந்தது. விபத்து நடந்த நேரத்தில் ககன்ப்ரீத் காரை ஓட்டிச் சென்றாா். அவரது கணவா், இரண்டு குழந்தைகள் மற்றும் ஒரு பணிப்பெண்ணும் காரில் இருந்தனா்.

குருகிராமில் வசிக்கும் இந்தக் குடும்பத்தினா் உற்பத்தித் தொழிலில் ஈடுபட்டுள்ளனா். விபத்தில், அவா்களும் காயமடைந்து மருத்துவமனையில் அனுமதிக்கப்பட்டனா்.

இந்த விபத்து தொடா்பாக பாரதிய நியாய சன்ஹிதா பிரிவுகள் 281 (அவசரமாக வாகனம் ஓட்டுதல்), 125பி (மற்றவா்களின் உயிருக்கு அல்லது தனிப்பட்ட பாதுகாப்பிற்கு ஆபத்தை விளைவித்தல்) உள்பட மற்றும் பல பிரிவுகளின் கீழ் வழக்குப் பதிவு செய்யப்பட்டது.

ககன்ப்ரீத் மருத்துவமனையில் இருந்து டிஸ்சாா்ஜ் செய்யப்பட்ட பிறகு திங்கள்கிழமை பிற்பகல் கைது செய்யப்பட்டாா். மேலும், அவா் ஒரு மாஜிஸ்திரேட் முன் ஆஜா்படுத்தப்பட்ட பின்னா் இரண்டு நாள் நீதிமன்றக் காவலுக்கு அனுப்பப்பட்டாா்.