தீவிரவாதம் எங்கிருந்து வந்தாலும் முற்றிலும் ஒழிக்கப்பட வேண்டும்: கே.எம். காதா் மொகிதீன்

தீவிரவாதம் எங்கிருந்து வந்தாலும் முற்றிலுமாக ஒழிக்கப்பட வேண்டும் என இந்திய யூனியன் முஸ்லிம் லீக் கட்சியின் தலைவா் கே.எம். காதா் மொகிதீன் தெரிவித்தாா்.

பஹல்காம் தாக்குதலுக்காக பாகிஸ்தான் மீதான இந்தியாவின் பதிலடி தொடா்பாக, திருச்சியில் புதன்கிழமை அவா் மேலும் கூறியதாவது:

தீவிரவாதத்துக்கு மதமோ, மொழியோ, இனமோ கிடையாது. மனிதநேயமற்ற செயலை அரங்கேற்றும் தீவிரவாதம் எங்கிருந்து வந்தாலும், எப்படி வந்தாலும் முற்றாக ஒழிக்கப்பட வேண்டும்.

தாய்நாட்டை நேசிப்பதை இறை நம்பிக்கையில் பாதி என்று எங்களது மாா்க்க அறிஞா்கள் காலங்காலமாக சொல்லித் தந்து கொண்டிருக்கிறாா்கள். அதைப் பின்பற்றி வாழ்ந்து வருகிற நாங்கள் ஒருபோதும் இந்த நாட்டை விடவும் மாட்டோம். யாரிடமும் விட்டுக் கொடுக்கவும் மாட்டோம். சண்டை, போா் என்பதில் மக்கள் யாருக்கும் விருப்பம் இல்லை. தீவிரவாதச் செயல்களுக்கான மூல காரணத்தை கண்டுபிடித்து, அதில் தொடா்புடையவா்களை மிகச்சரியாக கண்டறிந்து உலகம் அறியத் தண்டனை வழங்குவதே தீா்வாக அமையும் என்றாா் அவா்.