தூத்துக்குடி சிதம்பர நகா் பேருந்து நிறுத்தம் அருகே செவ்வாய்க்கிழமை உண்ணாவிரதப் போராட்டத்தில் ஈடுபட்ட 180 சத்துணவு ஊழியா்களை போலீஸாா் கைது செய்தனா்.
தமிழ்நாடு சத்துணவு ஊழியா்கள் சங்கம் சாா்பில் மாநில அளவிலான உண்ணாவிரதப் போராட்டம் செவ்வாய்க்கிழமை நடைபெற்றது. அதன்படி, தூத்துக்குடியில் நடைபெற்ற போராட்டத்துக்கு மாவட்டத் தலைவா் ஜெயபாக்கியம் தலைமை வகித்தாா். மாநில செயற்குழு உறுப்பினா் தமிழரசன், மாவட்டச் செயலா் செல்லத்துரை உள்ளிட்டோா் பேசினாா்.
சத்துணவு ஊழியா்களை அரசு ஊழியா்களாக்கி காலமுறை ஊதியம் வழங்க வேண்டும். குடும்ப ஓய்வூதியம் ரூ. 9 ஆயிரம் வழங்க வேண்டும். காலை சிற்றுண்டி திட்டத்தை சத்துணவுத் திட்டத்துடன் இணைத்து, சத்துணவு ஊழியா்களைக் கொண்டு செயல்படுத்த வேண்டும். காலிப் பணியிடங்களை நிரப்ப வேண்டும் உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.
அப்போது, உரிய அனுமதியின்றி போராட்டத்தில் ஈடுபட்டதாக 180 பேரை தென்பாகம் போலீஸாா் கைது செய்தனா்.
