தேர்தலில் வெற்றி: மீண்டும் ஆஸி. பிரதமராகிறார் ஆன்டனி ஆல்பனீஸி! மோடி வாழ்த்து

சிட்னி: ஆஸ்திரேலியாவில் நடைபெற்ற தேர்தலில் அந்நாட்டின் பிரதமர் ஆன்டனி ஆல்பனீஸி வெற்றிவாகை சூடியுள்ளார்.

ஆஸ்திரேலிய நாடாளுமன்றத்தின் பிரதிநிகள் அவையில் 150 இடங்களில் 86 இடங்களைக் கைப்பற்றி ஆளுங்கட்சியான தொழிலாளர் கட்சியே மீண்டும் ஆட்சியமைக்கும் என்று தேர்தல் முதல்கட்ட முடிவுகள் வெளிக்காட்டுகின்றன. இதன்மூலம், இந்த தேர்தலில், ஆளுங்கட்சியாக உள்ள தொழிலாளர் கட்சிக்கு மக்கள் பேராதரவு அளித்திருப்பதை தேர்தல் முடிவுகள் பிரதிபலிக்கின்றன.

இத்தேர்தல் வெற்றி மூலம், கடந்த 2022-ஆம் ஆண்டு ஆஸ்திரெலிய பிரதமராகப் பதவியேற்றுக் கொண்ட ஆல்பனீஸி மீண்டும் பிரதமராகத் தொடர்ந்து அந்நாட்டு அரசை வழிநடத்த உள்ளார். இந்த வெற்றியின் மூலம், ஆஸ்திரேலியாவில் கடந்த இருபது ஆண்டுகளில், தொடர்ச்சியாக அடுத்தடுத்த தேர்தல்களில் வெற்றி பெற்று இரண்டாவது முறையாக ஒருவர் மீண்டும் பிரதமர் பதவிக்கு தேர்ந்தெடுக்கப்பட்டுள்ளார். இது, அந்நாட்டின் வரலாற்றில் மிகப்பெரிய சாதனையாகவே பார்க்கப்படுகிறது.

எதிர்க்கட்சித் தலைவரான பீட்டர் டட்டன், இந்தத் தேர்தலில் தோல்வியை ஒப்புக்கொண்டிருப்பதுடன், தாம் போட்டியிட்ட டிக்சனில் ஆளுங்கட்சி வேட்பாளர் அலி பிரான்சிடம் தோல்வியடைந்துள்ளார்.

இந்தநிலையில், தேர்தல் தோல்விக்கு தாமே முழு பொறுப்பேற்றுக்கொள்வதாகவும் அவர் தெரிவித்திருக்கிறார். ‘இத்தோல்வியானது நாம் யார் என்பதை தீர்மானித்து விடாது’ என்று தமது கட்சிக்காரர்களுக்கு ஊக்கமளிக்கும் விதமாக அவர் பேசியுள்ளார்.

‘தொழிலாளர் கட்சிக்கு இதுவொரு வரலாற்று வெற்றி. இதனை நாங்கள் ஏற்றுக்கொள்கிறோம்’ என்றும் அவர் மனதாரப் பாரட்டியுள்ளார்.

ஆஸ்திரேலிய வரலாற்றில் இதுவரை எந்தவொரு எதிர்க்கட்சி தலைவரும் தாம் போட்டியிட்ட தேர்தலில் தோல்வியே அடைந்ததில்லை என்பது குறிப்பிடத்தக்கது. ஆனால் இப்போது அந்த வரலாறு மக்களின் தீர்ப்பால் மாற்றப்பட்டிருக்கிறது.

தேர்தல் வெற்றி குறித்து பிரதமர் ஆல்பனீஸி பேசுகையில், “ஆஸ்திரேலியாவின் மதிப்புகளுக்காகவும், எதிர்காலத்துக்காகவும், உலகளாவிய சவால்களை ஆஸ்திரேலியாவுக்கே உரிய பாணியில் எதிர்கொள்ளவும் இன்று, ஆஸ்திரேலிய மக்கள் தங்கள் கட்சிக்கு வாக்கு செலுத்தியுள்ளனர்’ என்று குறிப்பிட்டுள்ளார்.

இத்னிடையே, ஆஸ்திரேலிய பிரதமராகும் ஆன்டனி ஆல்பனீஸிக்கு பிரதமர் நரேந்திர மோடி வெளியிட்டுள்ள வாழ்த்துச் செய்தியில், ‘ஆஸ்திரேலிய பிரதமராக மீண்டும் தேர்வானதற்கும், இந்த பெரும் வெற்றிக்கும் வாழ்த்துகள்’ என்று குறிப்பிட்டுள்ளார்.

மேலும் அவர் கூறியிருப்பதாவது: ‘இதன்மூலம், ஆஸ்திரேலிய மக்கள் உங்கள் தலைமையின் மீது வைத்துள்ள நம்பிக்கை வெளிப்பட்டுள்ளது. இந்தியா - ஆஸ்திரேலியா இடையிலான உறவை மேலும் வலுப்படுத்தவும், இந்தோ-பசிபிக் பிராந்தியத்தில் அமைதி, நிலைத்தன்மை, செழிப்புக்கான நமது தொலைநோக்குப் பார்வையை முன்னோக்கி நகர்த்தவும் நாம் இணைந்து பணியாற்றுவதை எதிர்நோக்கியிருப்பதாகவும்’ அவர் குறிப்பிட்டுள்ளார்.