தொடரும் மீனவர் சிறை பிடிப்பு... ராமேஸ்வரம் மீனவர்கள் 8 பேரை 2 படகுகளுடன் கைதுசெய்த இலங்கை கடற்படை!

பாக் நீரிணை பகுதியில் மீன்பிடிக்க செல்லும் ராமநாதபுரம் உள்ளிட்ட 6 மாவட்ட மீனவர்களை இலங்கை கடற்படையினர் சிறைபிடிப்பது பல ஆண்டு காலமாக தொடர்கிறது. கடந்த ஒரு ஆண்டில் மட்டும் சுமார் 569 மீனவர்கள் கைதுசெய்யப்பட்ட நிலையில் அவர்களுக்குச் சொந்தமான 73 படகுகளும் இலங்கை அரசால் பறிமுதல் செய்யப்பட்டுள்ளது. இந்நிலையில் கடந்த மாதம் இந்தியா வந்த இலங்கை அதிபர் அனுர குமார திசாநாயக்க பிரதமர் மோடியை சந்தித்து பேசினார். அப்போது தமிழக மீனவர்கள் பிரச்னைக்கு மனிதாபிமான முறையில் தீர்வு காண நடவடிக்கை எடுக்கப்பட இருப்பதாக தகவல்கள் வெளியாகின. ஆனால் அவர் வந்து சென்ற அடுத்த வாரத்திலேயே 17 மீனவர்களை இலங்கை கடற்படை பிடித்து சென்றது.

இதனை தொடர்ந்து இந்த ஆண்டு துவக்கத்தில் நாகை மாவட்ட மீனவர்கள் 10 பேர் இலங்கை கடற்படையினரால் சிறை பிடித்து செல்லப்பட்டனர். சிறைபிடிக்கப்பட்ட மீனவர்களை உடனடியாக விடுவிக்க நடவடிக்கை எடுக்க வலியுறுத்தி தமிழக முதல்வரும் பிரதமருக்கு கடிதம் எழுதியிருந்தார். இதனிடையே கடந்த 3 தினங்களுக்கு முன் தமிழகத்திற்கு வந்த மத்திய மீன்வளத்துறை இணை அமைச்சர் ஜார்ஜ் குரியன், ''தமிழக மீனவர்கள் சிறைபிடித்து செல்லப்படுவது குறித்து வெளியுறவுத்துறை மற்றும் மத்திய மீன்வளத்துறை செயலாளர்கள் இலங்கை உயர் அதிகாரிகளுடன் பேச்சுவார்த்தை நடத்தி வருகின்றனர்'' எனத் தெரிவித்திருந்தார்.

ஆனால் அவரது கருத்துக்கு எதிராக இலங்கை கடற்படையினர் இன்றும் 8 மீனவர்களை சிறை பிடித்து சென்றுள்ளனர். ராமேஸ்வரத்தில் இருந்து நேற்று 169 விசைப்படகுகள் மீன்பிடிக்க சென்றன. இதில் முகேஷ்குமார் மற்றும் மரிய ரெட்ரிக்சன் ஆகியோருக்கு சொந்தமான 2 விசைப்படகுகளில் சென்ற 8 மீனவர்கள் இன்று அதிகாலை பாரம்பர்ய பகுதிகளில் மீன்பிடித்துக் கொண்டிருந்தனர்.

அப்போது அங்கு வந்த இலங்கை கடற்படையினர், களஞ்சியம், முனீஸ்வரன், கார்மேகம், கண்ணன், பிரிஸ்மன், மரிய ஜான் ரெமோரா, பிரியன், சவேரியார் அடிமை ஆகிய 8 மீனவர்களை படகுகளுடன் சிறை பிடித்து சென்றனர். நாளை மறுதினம் பொங்கல் பண்டிகை கொண்டாடப்பட உள்ள நிலையில் ராமேஸ்வரம் மீனவர்கள் சிறை பிடித்து செல்லப்பட்ட சம்பவம் மீனவர்களிடையே அதிர்ச்சியை ஏற்படுத்தியுள்ளது.