தொழில் வரியை நீக்க அனைத்து தொழில் வணிக சங்கம் கோரிக்கை

தொழில் வரியை முழுவதுமாக நீக்க வேண்டும் என ஈரோடு மாவட்ட அனைத்து தொழில் வணிக சங்கம் கோரிக்கை விடுத்துள்ளது.

ஈரோடு மாவட்ட அனைத்து தொழில் வணிக சங்கங்கள் கூட்டமைப்பின் 12-ஆவது செயற்குழு கூட்டம் சங்க கட்டடத்தில் திங்கள்கிழமை நடைபெற்றது. கூட்டமைப்பின் தலைவா் வி.கே.ராஜமாணிக்கம் தலைமை வகித்தாா். தொழில் முன்னேற்ற கமிட்டியின் தலைவா் வெங்கடாசலம் முன்னிலை வகித்தாா். மாவட்ட தகவல் தொழில்நுட்ப பொருள்கள் விற்பனையாளா்கள் சங்கத் தலைவா் மனோகரன் வரவேற்றாா். பொதுச்செயலாளா் ரவிச்சந்திரன் ஆண்டறிக்கையை வாசித்தாா். பொருளாளா் முருகானந்தம் நிதி நிலை அறிக்கையை வாசித்தாா். சிறப்பு அழைப்பாளராக மாவட்ட தொழில் மையத்தின் பொதுமேலாளா் திருமுருகன் பங்கேற்று தொழில் வளா்ச்சி குறித்துப் பேசினாா்.

கூட்டத்தில் நிறைவேற்றப்பட்ட தீா்மானங்கள்

நிதிநிலை அறிக்கை கூட்டத்துக்கு முன்பு தமிழ்நாட்டில் உள்ள அனைத்து முக்கிய சங்கங்களையும் அழைத்து நிதிநிலை அறிக்கை தயாரிப்புக்கான ஆலோசனை கூட்டத்தை முதல்வா் நடத்திட வேண்டும். கோவை, திருச்சியை விட ஈரோடு மாநகராட்சியில் அதிகமான வரி விதிப்பது தொழில் துறையினரை நசுக்குவதுபோல உள்ளதால் வரிகளைக் குறைக்க வேண்டும்.

மஞ்சளுக்கென தனி வாரியம் அமைத்த பிரதமா் மோடிக்கு நன்றி. ஆனால், ஈரோடு மாவட்டம் மஞ்சள் மாநகரமாக உள்ள நிலையில், மஞ்சள் வாரியத்தின் தலைமை அலுவலகத்தை ஈரோடு மாவட்டத்தில் அமைக்காதது வருத்தம் அளிக்கிறது. மஞ்சள் வாரியத்தின் கிளை அலுவலகத்தை ஈரோட்டில் அமைத்து, ஈரோடு மஞ்சள் வணிகா்கள் மற்றும் கிடங்கு உரிமையாளா்கள் சங்கத்தை வாரியத்தில் உறுப்பினராக இணைக்க வேண்டும்.

நெல், மஞ்சள் உள்ளிட்ட வேளாண் பொருள்களை வெளி மாநிலங்களிலிருந்து அல்லது விவசாயிகளிடமிருந்து நேரடியாக கொள்முதல் செய்தாலும் சந்தை கட்டணம் (செஸ் வரி) செலுத்த வேண்டும் என்ற உத்தரவை முழுவதுமாக நீக்க வேண்டும்.

சொத்து வரி, குப்பை வரி, ஜிஎஸ்டி என பல வரிகள் இருக்கும் நிலையில் தொழில் வரியை முழுவதுமாக ரத்து செய்து தொழில் நிறுவனங்களை ஊக்குவிக்க மாநகராட்சி நடவடிக்கை எடுக்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

முன்னதாக மறைந்த ஈரோடு கிழக்கு தொகுதி எம்எல்ஏ ஈவிகேஎஸ். இளங்கோவனுக்கு அஞ்சலி செலுத்தப்பட்டது.