‘நாசிக்-திரிம்பகேஷ்வரில் அடுத்த ஆண்டு சிம்ஹஸ்த கும்பமேளா’

நாசிக்/மும்பை: மகாராஷ்டிர மாநிலம் நாசிக் மற்றும் திரிம்பகேஷ்வர் நகரங்களில் கோதாவரி நதியில் அடுத்த ஆண்டு அக். 31இல் சிம்ஹஸ்த கும்ப மேளா தொடங்கும் என்று அறிவிக்கப்பட்டுள்ளது.

நாசிக் நகரில் மகாராஷ்டிர முதல்வர் தேவேந்திர ஃபட்னவீஸ் தலைமையில் நடைபெற்ற துறவிகள் மற்றும் மடாதிபதிகளின் கூட்டத்தில் இந்த அறிவிப்பு வெளியானது. இந்த விழாவுக்கான ஏற்பாடுகள் பிரமிக்கத்தக்கதாக இருக்கும் என்று ஃபட்னவீஸ் தெரிவித்தார்.

அதன்படி, திரிம்பகேஷ்வரிலும் நாசிக்கின் ராம்குண்ட் பகுதியிலும் அடுத்த ஆண்டு அக். 31ஆம் தேதி கொடியேற்றத்துடன் சிம்ஹஸ்த கும்பமேளா தொடங்க உள்ளது. அதைத் தொடர்ந்து 2027ஆம் ஆண்டு ஜூலை 29ஆம் தேதி நகர பிரதட்சிணம் நிகழ்வு நடைபெறும். 2027ஆம் ஆண்டு ஆகஸ்ட் 2ஆம் தேதி முதல் அமிர்த ஸ்னானமும், ஆகஸ்ட் 31ஆம் தேதி இரண்டாவது அமிர்த ஸ்னானமும் நடைபெறும். மூன்றாவது அமிர்த ஸ்னானம், 2027இல் நாசிக் நகரில் செப்டம்பர் 11ஆம் தேதியும், திரிம்பகேஷ்வர் நகரில் செப்டம்பர் 12ஆம் தேதியும் நடைபெறும்.

2028ஆம் ஆண்டு ஜூலை 24ஆம் தேதி கொடி இறக்கப்பட்டு, சிம்ஹஸ்த கும்பமேளா முடிவுக்கு வரும். சிம்ஹஸ்த கும்பமேளா என்பது மகாராஷ்டிரத்தில் 12 ஆண்டுகளுக்கு ஒருமுறை நடைபெறும் நிகழ்வாகும்.

முந்தைய சிம்ம ஹஸ்த கும்பமேளா நாசிக்கிலும், திரிம்பகேஷ்வரிலும் கடந்த 2015-16ஆம் ஆண்டு நடைபெற்றது. நாசிக்}திரிம்பகேஷ்வர் கும்ப மேளாவில் வைஷ்ணவ மடாதிபதிகளும், சைவ மடாதிபதிகளும் தனித்தனியாக புனித நீராடுவது வழக்கம்.

இது தொடர்பாக மகாராஷ்டிர முதல்வர் தேவேந்திர ஃபட்னவீஸ், செய்தியாளர்களிடம் கூறியதாவது:

சிம்ஹஸ்த கும்பமேளா தொடர்பான ஆலோசனைக் கூட்டத்தில் 13 முக்கிய மடங்களின் பீடாதிபதிகளும், புரோகிதர்கள் சங்கத்தின் பிரதிநிதிகளும் கலந்து கொண்டனர். கும்பமேளாவை நடத்துவதற்கு மகாராஷ்டிர மாநில அரசு எடுத்து வரும் நடவடிக்கைகள் தொடர்பான விவரங்கள் அவர்களிடம் எடுத்துக் கூறப்பட்டது.

இதற்காக ரூ.4,000 கோடி மதிப்பிலான பணிகளுக்கு ஒப்பந்தப் புள்ளிகள் கோரப்பட்டுள்ளன. விரைவில் மேலும் 2,000 கோடி மதிப்பிலான பணிகளுக்கு டெண்டர் விடப்படும். கும்பமேளாவுக்காக கழிவுநீர் சுத்திகரிப்பு, கோதாவரி நதியை சுத்தப்படுத்துவது, துறவிகள் தங்குவதற்கான கிராமத்தை அமைப்பது ஆகியவற்றுக்கான பணிகளும் நடைபெற்று வருகின்றன என்றார் அவர்.