நீலகிரி மாவட்ட ஆட்சியா் அலுவலகத்தில் மக்கள் குறைதீா் கூட்டம் திங்கள்கிழமை நடைபெற்றது. இக்கூட்டத்துக்கு மாவட்ட ஆட்சியா் லட்சுமி பவ்யா தன்னேரு தலைமை வகித்தாா்.
இதில், வீட்டுமனை பட்டா, முதியோா், விதவை, கல்வி உதவித் தொகை, வங்கிக் கடன், சாலை வசதி உள்ளிட்ட பல்வேறு கோரிக்கைகள் தொடா்பாக பொதுமக்களிடமிருந்து மொத்தம் 143 மனுக்கள் பெறப்பட்டன. இந்த மனுக்களை சம்பந்தப்பட்ட துறை அலுவலா்களிடம் வழங்கிய ஆட்சியா் உடனடி நடவடிக்கை எடுக்க உத்தரவிட்டாா்.
இதைத் தொடா்ந்து, நீலகிரி மாவட்ட முஸ்லிம் மகளிா் உதவும் சங்க உறுப்பினா்கள் மூலம் வசூலிக்கப்பட்ட நன்கொடைகள் அதற்கு தமிழ்நாடு அரசால் 1:2 என்ற விகிதத்தில் வழங்கப்படும் இணை மானியத் தொகை ஆகிய ஒருங்கிணைந்த தொகையில் இருந்து 2 பயனாளிகளுக்கு தலா ரூ.10 ஆயிரத்துக்கான காசோலைகளை ஆட்சியா் வழங்கினாா்.
தொடா்ந்து, தென்காசி மாவட்டத்தில் சுரங்க மற்றும் புவியியல் உதவி இயக்குநராக கடந்த 2022-ஆண் ஆண்டு பணிபுரிந்தபோது, முன்னாள் படை வீரா் நிதி ரூ.5 லட்சத்துக்கு மேல் வசூல் செய்து, தற்போது நீலகிரி மாவட்டத்தில் புவியியல் மற்றும் சுரங்கத் துறையில் உதவி இயக்குநராக பணிபுரிந்து வரும் வினோத்துக்கு வெள்ளிப் பதக்கம், ஆளுநரின் பாராட்டுச் சான்றிதழையும், ஈரோடு மாவட்டத்தில் வருவாய் கோட்டாட்சியராக பணிபுரிந்தபோது கொடி நாள் நிதி ரூ.5 லட்சத்துக்குமேல் வசூல் செய்து, தற்போது நீலகிரி மாவட்ட ஆட்சியரின் நோ்முக உதவியாளராக உள்ள சதிஷ்குமாருக்கு வெள்ளிப் பதக்கம், ஆளுநரின் பாராட்டுச் சான்றிதழையும் வழங்கி மாவட்ட ஆட்சியா் பாராட்டினாா்.
சிறப்பாக செயல்பட்டு வரும் கோத்தகிரி, கோ்கம்பை ஊராட்சி ஒன்றிய தொடக்கப் பள்ளிக்கு ரூ.25 ஆயிரம், கூடலூா் பாட்டவயல் ஊராட்சி ஒன்றிய நடுநிலைப் பள்ளிக்கு ரூ.50 ஆயிரம், கோத்தகிரி மிளிதேன் அரசு உயா்நிலைப் பள்ளிக்கு ரூ.75 ஆயிரம், கூடலூா் தேவா்சோலை அரசு மேல்நிலைப் பள்ளிக்கு ரூ. 1 லட்சத்துக்கான காசோலைகளை சம்பந்தப்பட்ட பள்ளிகளின் தலைமை ஆசிரியா்களிடம் மாவட்ட ஆட்சியா் வழங்கினாா்.
இக்கூட்டத்தில், கூடுதல் ஆட்சியா் கௌசிக், குன்னூா் சாா் ஆட்சியா் சங்கீதா மாவட்ட பிற்படுத்தப்பட்டோா், சிறுபான்மையினா் நலத் துறை அலுவலா் சுரேஷ் கண்ணன் உள்ளிட்டோா் கலந்துகொண்டனா்.
