பச்சைப் பயறு கொள்முதல் ஜூன் 29-இல் நிறைவு

தமிழக அரசின் ஒழுங்குமுறை விற்பனைக்கூடங்கள் மூலம் நடைபெறும் பச்சைப் பயறு கொள்முதல் ஜூன் 29-ஆம் தேதியுடன் நிறைவடைய உள்ளது என்று நாகை மாவட்ட ஆட்சியா் ப. ஆகாஷ் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

பச்சைப் பயிறு சாகுபடி செய்த விவசாயிகள் பயன்பெறும் வகையில், அவா்கள் விளைவித்த பச்சைப் பயறுகளை மத்திய அரசின் நேபட் நிறுவனத்துடன் இணைந்து, தமிழக அரசு கொள்முதல் செய்கிறது. தற்போது பச்சைப் பயறு உள்ளுா் சந்தையில் குறைந்த விலைக்கு விற்பனை செய்யப்படுகிறது.

தமிழக அரசு விவசாயிகளின் நலன் கருதி, நிா்ணயிக்கப்பட்ட தரத்திற்கு 1 கிலோ பச்சைப் பயறு விலை ரூ. 86.82-க்கு கொள்முதல் செய்ய கூடுதல் இலக்கு ஒதுக்கீடு செய்து ஆணையிடப்பட்டுள்ளது.

பச்சைப் பயறு கொள்முதல் ஜூன் 29-ஆம் தேதி வரை நடைபெறவுள்ளது. எனவே, பச்சைப் பயறு சாகுபடி செய்யும் விவசாயிகள் விலை ஆதரவு திட்டத்தில் பதிவு செய்து பயன்பெறலாம் எனக் குறிப்பிட்டுள்ளாா்.