விருதுநகா் அருகேயுள்ள பொம்மையாபுரம் பட்டாசு ஆலையில் ஏற்பட்ட வெடி விபத்து தொடா்பான வழக்கில் 3 பேரை போலீஸாா் ஞாயிற்றுக்கிழமை கைது செய்தனா்.
விருதுநகா் அருகே பொம்மையாபுரத்தில் உள்ள ஒரு பட்டாசு ஆலையில் சனிக்கிழமை வெடி விபத்து ஏற்பட்டது. இந்த விபத்தில் சிவக்குமாா் (56), வேல்முருகன் (54), காமராஜ் (54), கண்ணன் (54), மீனாட்சிசுந்தரம் (46), நாகராஜ் (37) ஆகிய 6 தொழிலாளா்கள் உயிரிழந்தனா். ஒருவா் பலத்த காயமடைந்தாா்.
இதுதொடா்பாக அந்த ஆலையின் உரிமையாளா் பாலாஜி, அந்த ஆலையை விலைக்கு வாங்கிய 2-ஆவது உரிமையாளா் சசிபாலன், பங்குதாரா் நிரஞ்சனா தேவி, கண்காணிப்பாளா்கள் கணேசன், பிரகாஷ், பாண்டியராஜ், மேற்பாா்வையாளா் சதீஷ் குமாா் ஆகிய 7 போ் மீது வச்சகாரபட்டி போலீஸாா் வழக்குப் பதிவு செய்தனா். இவா்களில் சசிபாலன், கணேசன், சதீஷ்குமாா் ஆகிய மூவரை போலீஸாா் ஞாயிற்றுக்கிழமை கைது செய்து சிறையில் அடைத்தனா்.
